Nga Bekim Laçi
“Shërbimi i Sigurisë Kombëtare i cili vepron me urdhër të qeverisë konservatore të Maqedonisë, qëndron pas skandalit të përgjimit që e ka sjellë vendin në situatë që mund të shpërthejë.”
Me këtë konstatim ka dalë mbrëmë prestigjozja amerikane “The New York Times” e cila shkruan se publikimi i dokumentit nga ana e Komisionit Evropian të premten e kaluar, solli një raund tjetër bisedimesh të pasuksesshme në kryeqytet, me qëllim të zgjidhjes së krizës, e cila është nga më të mëdhat që prej pavarësisë së shtetit në vitin 1991.
Gazeta amerikane më tej shkruan për hetimin në bazë të të cilit janë gjetur 670.000 biseda të regjistruara në mënyrë të paligjshme nga më shumë se 20.000 numra telefonikë, të cilat dëshmuan strukturën demokratike të plasaritur të Maqedonisë, e cila mbikqyret nga afër nga qeveritë perëndimore, sepse gjendet në udhëkryq të Ballkanit.
Sipas dokumentit, i cili është përgatitur nga ekspertë të pavarur, qeveria nën drejtim të Nikolla Gruevskit ka keqpërdorur shërbimet e sigurisë kombëtare “për të kontrolluar zyrtarët e lartë në administratën publike, prokurorët, gjyqtarët dhe kundërshtarët politikë.”
Raporti gjithashtu vë në dukje “përfshirjen e drejtpërdrejtë të zyrtarëve të lartë të qeverisë dhe të partisë në mashtrim elektoral, korrupsion, keqpërdorim të pushtetit, shantazhe si dhe “ndërhyrje të papranueshme të politikës në emërimin gjykatësve”.
Pas publikimit të këtij dokumenti, shkruan gazeta, Gruevski ka mbetur i heshtur për 24 orë për të akuzuar më vonë një organizatë të paidentifikuar, duke aluduar në shërbim të huaj të zbulimit, i cili siç tha, ka paguar një shumë të parave që të bëjnë inçizime të paautorizuara të bisedave telefonike.
Gruevski është i gatshëm të pranojë çdo zgjidhje, madje edhe krijimin e një qeverie kalimtare, përderisa ai mbetet në fuqi, por ka qenë liderin opozitar Zaev që ka deklaruar se ata janë për një qeveri kalimtare, pa kryeministrin Gruevski. /tesheshi.com/
