Pasi që kryeparlamentari Trajko Veljanovski ka braktisur karrigen dhe sallën e Kuvendit, shumica e re parlamentare e Maqedonisë e përbërë nga LSDM ,BDI dhe Aleanca për Shqiptarët kanë zgjedhur Talat Xhaferin si kryeparlamentar të ri. Deputetët e VMRO-DPMNE-së po thonë se ky është një puç.
Nga ana tjetër, deputeti i Lëvizjes BESA, Zeqirija Ibrahimi ka shprehur keqardhje që me rastin e përzgjedhjes së Talat Xhaferit është keqpërdorur Rregullorja dhe është lejuar që të këndohet himni maqedonas në Kuvend. “Unë e respektoj himnin, por shqiptarët kanë himnin e tyre. Pasi lejuat që të këndohet një pjesë e himnit në gjuhën maqedonase, do të këndoj edhe unë himnin e shqiptarëve”.
Pas kësaj ai e intonoi himnin kombëtar nga foltorja e Kuvendit. Në ndërkohë, me qindra protestues të VMRO-DPMNE-së të pakënqur nga përzgjedhja e Talat Xhaferit, kanë filluar me brohoritje antishqiptare dhe sulmojnë Kuvendin. Ata kërcënohen se nëse formohet qeveri e re, do të ketë gjendje të jashtëzakonshme në Maqedoni. /tesheshi.com/
