Në kuadër të pjesëmarrjes në ceremonitë me rastin e 2 gushtit, Ditës së Republikës së Maqedonisë, kryeparlamentari Talat Xhaferi ka mbajtur një fjalim në manifestimin qendror i cili u mbajt në “Meçkin Kamen”, në Krushevë.
Gjatë fjalës të tij, Xhaferi thuri lavde për udhëheqësit e Kryengritjes së Ilindenit, Nikolla Karev, Goce Dellçev, Dame Gruev, Pitu Guli dhe heronjtë e tjerë të njohur dhe të panjohur, që sipas tij kanë treguar se kanë pasur vlera dhe parime të larta të zhvilluara civilizuese për bashkësinë, tolerancën dhe respektimin e të drejtave dhe lirive të njeriut, pa dallim të fesë, përkatësisë etnike, gjinisë apo statusit social.
Ai gjithashtu deklaroi se Maqedonia është atdheu ynë i përbashkët.
“Ne e kemi një atdhe të përbashkët Republikën e Maqedonisë, dhe të gjithë ne jemi përgjegjës për ta ruajtur dhe zhvilluar, për ne dhe për brezat e ardhshëm. Njëkohësisht, të gjithë ne që jetojmë këtu ose së paku shumica e qytetarëve, ndajmë edhe një përcaktim të përbashkët, e nëse dëshironi edhe ëndërr të përbashkët, e kjo është integrimi i plotë në BE dhe NATO”, ka thënë mes tjerash Xhaferi. /tesheshi.com/
