Qeveritë duhet të hapin një front të ri në luftën kundër evazionit fiskal duke vendosur një taksë minimale globale për më të pasurit, e cila do të mblidhte 250 miliardë dollarë në vit, ka llogaritur Observatori Evropian i Taksave.
Kjo është vetëm dy për qind e pothuajse 13 trilionë dollarëve të aseteve të 2700 miliarderëve në mbarë botën, zbuloi grupi kërkimor i Shkollës Ekonomike të Parisit në një raport të publikuar të hënën.
Miliarderët de facto në shumë vende paguajnë taksa me tarifa shumë më të ulëta se taksapaguesit me mjete modeste, sepse ata mund të “parkojnë” pasurinë në kompani fiktive që i mbrojnë nga detyrimet tatimore, thekson grupi në Raportin Global për Evazionin Tatimor.
“Ne e konsiderojmë të vështirë për të justifikuar atë [zbrazëti tatimore], pasi ajo minon qëndrueshmërinë e sistemeve tatimore dhe pranueshmërinë sociale të taksave,” tha drejtori i Observatorit Gabriel Zucman.
Mosmarrëveshjet në Kongresin Amerikan
Miliarderët në SHBA vlerësohet të paguajnë taksa mbi pasurinë me një normë prej afër 0.5 për qind, dhe në Francë, një vend përgjithësisht me taksa të larta, ata janë praktikisht të përjashtuar, vëren instituti.
Thellimi i pabarazisë në disa vende ka sjellë tashmë kërkesa që qytetarët më të pasur të paguajnë më shumë taksa, duke pasur parasysh presionin mbi financat publike në kushtet e plakjes së popullsisë, tranzicionit klimatik dhe borxheve pandemike.
Propozimi i buxhetit të SHBA-së për vitin 2024 kërkonte një taksë minimale për 25 përqindëshin më të pasur, por ai u vendos në prapavijë për shkak të një mosmarrëveshjeje në Kongres mbi ngrirjen e shpenzimeve buxhetore dhe kufirin e huamarrjes.
Një iniciativë e koordinuar ndërkombëtare për taksimin e miliarderëve mund të sjellë rezultate vetëm në pak vite, pranon instituti, por ata kujtojnë luftën e suksesshme kundër sekretit bankar dhe praktikës së korporatave të zhvendosjes së fitimeve në vendet me taksa më të ulëta.
Shkëmbimi automatik i të dhënave të llogarisë ka reduktuar shumat në parajsat fiskale me dy të tretat që nga viti 2018, vlerëson Observatori.
Marrëveshja e vitit 2021 do të kufizojë hapësirën e manovrimit të kompanive shumëkombëshe për të ulur detyrimet e tyre tatimore duke rezervuar fitime në vendet me taksa të ulëta duke vendosur një prag tatimor prej 15 për qind nga viti 2024.
Jo të gjitha “vrimat” janë mbyllur
“Shumë menduan se një gjë e tillë ishte e pamundur të arrihej, por tani e dimë se është edhe e mundur”, tha Zucman.
“Hapi i ardhshëm logjik do të ishte aplikimi i këtij modeli në taksimin e miliarderëve, jo vetëm të kompanive shumëkombëshe”, shtoi ai.
Nëse nuk sigurohet një mbështetje e gjerë ndërkombëtare, “koalicioni i vullnetit” duhet të marrë iniciativën, beson ai.
Heqja e sekretit bankar dhe tatimi mbi fitimin minimal i kanë dhënë fund konkurrencës në uljen e taksave, por nuk i kanë mbyllur të gjitha “boshllëqet”, theksojnë autorët e raportit.
Të pasurit kanë zëvendësuar vendosjen e parave në parajsat fiskale duke blerë pasuri të paluajtshme dhe kompanitë mund të përfitojnë nga zbrazëtitë në dispozitën minimale të taksave prej 15 për qind.
Sot, qeveritë po konkurrojnë gjithnjë e më shumë me subvencione, megjithëse kjo është më pak e dëmshme për bazën e tyre tatimore sesa konkurrimi me norma të ulëta tatimore, sipas Observatorit. /tesheshi.com/
