Për rreth një orë e gjysmë, Kryeministri Edi Rama i shoqëruar nga ministri i Brendshëm Saimir Tahiri dhe kreu i grupit parlamentar socialist Gramoz Ruçi takoi sot aleatin qeverisës Ilir Meta. Ndërkohë kreu i Kuvendit shoqërohej nga drejtuesi i grupit parlamentar të LSI, Petrit Vasili.
Në mbyllje të takimit, socialisti Gramoz Ruçi tha se reforma në drejtësi dhe ajo zgjedhore ishin në fokus të takimit, ndërsa bëri me dije se mazhoranca mbështet veprimtarinë e deritanishme të dy komisioneve parlamentare dhe i përshëndet në punën e tyre.
“Mazhoranca i bën thirrje opozitës të fitojmë kohën e humbur veçanërisht për reformën në drejtësi me qëllim që dita e miratimit në parlament të jetë sa më shpejtë. Opozita është prezente në tryezën e komisionit të reformës, të gjitha opsionet janë në tryezën e diskutimit të komisionit”, u shpreh Ruçi.
Nga ana e tij Petrit Vasili i LSI, deklaroi se nuk ka kohë për të humbur dhe se momentet janë të çmuara për të mbyllur sa më parë reforma në drejtësi. “Të dëgjojmë çfarë thotë opozita dhe të dëgjojmë ekspertët e EURALIUS dhe OPDAT, pasi produkti final që shqiptarët presin, është miratimi i reformës”, deklaroi Vasili. /tesheshi.com/
