Asgjë nuk ka ndryshuar pas një ditë aktive të eurokomisionerit Hahn në takimet me politikën e Shkupit. Dhe kjo vlen të thuhet për finalen, atë pas bisedës mes tij dhe Gruevskit, ku pozicionet nuk lëvizën aspak. Lideri i VMRO-së nuk preferoi të dalë vetë e të flasë për mediat, pas takimit të përfunduar në orët e vona, duke zgjedhur të nxjerrë Milloshoskin.
Ky i fundit dhe po ato që thuhen tash e një muaj: që Zaev është i lirë të formojë qeveri vetëm me kusht që të heq dorë nga Platforma Shqiptare, ose në të kundërt vendi të shkojë në zgjedhje të parakohshme parlamentare duke i realizuar së bashku me ato lokale.
Ndërsa Hahn, së bashku me kolegët Ivo Vajgël dhe Knut Flekenshtajn kërkuan të kundërtën e tyre.
“Në një demokraci, të gjithë duhet të pranojnë shumicën parlamentare. Kështu që ne e inkurajojmë presidentin e shtetit që të rishqyrtojë urgjentisht vendimin e tij. Nuk ka kohë për të humbur. Ne tani presim nga liderët partiakë dhe nga institucionet që të lejojnë të rrjedhin proceset demokratike në interes të qytetarëve”, thuhet mes tjerash në një deklaratë të tyre, ku theksohet se vonesat e shkaktuara në muajt e fundit, tanimë shkaktojnë dëme për ekonominë e vendit.
Poashtu në komunikatë, thuhet se qeveria e re duhet të formohet sa më shpejt, në mënyrë që të vazhdojë zbatimi i reformave dhe zbatimi i të gjitha pikave nga Marrëveshja e Përzhinos.
Ndërsa të tjera, dërgata europiane me në krye Hahn kërkoi nga politikanët maqedonas që të përmbahen nga deklaratat që mund të nxisin tensione ndëretnike, duke paralajmëruar se askush nuk guxon të luajë me zjarrin. /tesheshi.com/
