Kreu i partisë Demokratike Lulzim Basha ka renditur një sërë pengesash doganore, taksa e tarifa që shtohen si problemet më të mëdha që ekzistojnë sot mes dy vendeve. Këto komente ai i bëri në takimin me presidenten e Kosovës, Atifete Jahjaga që është në ditën e saj të dytë të vizitës zyrtare në Tiranë.
Sipas Bashës, duhet të ndërmerren hapa funksionalë e praktike për thellimin e bashkëpunimit mes dy vendeve, ndërsa në takim nuk ka munguar edhe shpalosja e kritikave të opozitës ndaj qeverisë për situatën e brendshme.
“Raporti i OSBE- ODIHR për zgjedhjet e 21 qershorit nënvizon problematikën e madhe e cila ka pamundësuar shprehjen e lirë të vullnetit të zgjedhësve, përmes presionit, shitblerjes së votës”, tha Basha.
Ndërkaq, si në një takim kortezie, presidentja Jahjaga falënderoi Bashën për mbështetjen e madhe që tha ajo, PD dhe zoti Basha kanë dhënë për shpalljen e pavarësisë së Kosovës dhe njohjen ndërkombëtare të saj. /tesheshi.com/
