Nga Blendi Gashi
Ashtu edhe siç pritejm takimi konsultativ mes partive kosovare, përjashto Vetëvendosjen që nuk mori pjesë, ka përfunduar pa gjetjen e ndonjë kompromisi mes palëve për të vazhduar me konstituimin e oganeve të Kuvendit, konkretisht kryetarit e nënkryetarit.
Ky takim sërish vuri në pah ambiciet për pushtet dhe inatet personale ku asnjëra palë nuk lëvizi nga qëndrimet. Ndërsa koalicioni PAN (PDK-AAK-NISMA) vazhdon të bëj një kërkesë tejet absurde aq sa edhe qesharake që Vetëvendosje e LDK me aleatët t’ia japin votën për kryekuvendarin e kryeministrin, pala tjetër thotë se askush nuk po ja mohon të drejtën për kryekuvendarin por se nuk mund t’i detyrojnë t’ia japin votën.
Përplasje mes Mikullovcit me përfaqësuesit e PAN-it
Ky takim solli vetëm përplasje mes kryesuesit të mbledhjes, Adem Mikullovci dhe përfaqësuesit e PAN-it, Enver Hoxhajt të PDK-së e Pal Lekaj të AAK-së.
Hoxhaj akuzoi Mikullovcin se ka thirrë seancën e së enjtes n’krye t’vet, andaj edhe do ta bojkotojnë sërish.
“Kandidati ynë do të jetë Kadri Veseli dhe zgjedhja e tij, siç është edhe zgjedhja e Haradinajt për kryeministër janë të pandashme.Dua të ju bëjë me dije që nuk do të marrim pjesë nesër në seancë. Ju mund të hyni në sallë sa herë të dëshironi”, tha Hoxhaj.
Por Mikullovci ju kundërpërgjigj duke thënë se seanca është thirrur në mënyrë kushtetuese, ndërsa pas takimit bëri të qartë se ajo do mbahet.
Edhe Pal Lekaj nga AAK-ja e ka kritikuar Mikullovcin për thirrjen e seancës, ndërsa ka thënë se koalicioni PAN i ka votat për ta formuar qeverinë por nuk ka treguar pse atëherë e bojkotojnë seancën konstituive.
Por Mikullovci i është përgjigjur akuzave të Lekajt duke thënë se “PAN po thotë të pavërteta dhe po zhagit proceset”.
Mungesa e numrave…
Numrat u përmendën edhe në këtë takim, ku të dyja palët akuzuan njëra-tjetrën për mungesë të votave.
Shefi i grupit parlamentar të LDK-së, Avdullah Hoti, u ka kërkuar koalicionit PAN që të mos refuzojnë pjesëmarrjen në seancën e nesërme konstituive, ndërsa u ka thënë gjithashtu se PAN është mirë të tregon që nuk i ka numrat dhe nuk mund ta formojnë qeverinë.
Por Pal Lekaj u kundërpërgjigj duke thënë se i kanë numrat për qeverinë por nuk tregoj pse nuk rikthehen në Kuvend që të zgjedhin kryekuvendarin e të ecin më tutje.
Për numrat foli edhe Bilall Sherifi nga NISMA i cili duke u ndërlidhur me deklarimin e djeshëm të Avdullah Hotit se nuk bëjnë koalicion me Vetëvendosjen tha se as LDK e VV nuk i kanë numrat dhe se PAN mbetet koalicioni më i madh.
PAN dëshiron ende kohë…
Por kjo nuk ishte e tëra që ndodhi në këtë takim. PAN i Kadri Veselit e Ramush Haradinajt në takimin e sotëm kërkuan mbajtjen edhe të një takimi konsultativ për të mërkurën tjetër mes partive siç thanë për arritjen e një kompromisi të përbashkët për të tejkaluar situatën aktuale, por kjo kërkesë u refuzua.
Megjithatë jo të gjithë brenda PAN-it pajtohen me bojkotin e seancave. Pas deputetit të NISMA-s Milaim Zeka i cili ka konfirmuar pjesëmarrjen në seancën e nesërme, kundër bojkotit së fundmi është shprehur edhe një prej figurave kyçe të PDK-së Xhavit Haliti.
Ai në një deklarim bërë sot për mediat kosovare ka sugjeruar bashkëpartiakët e tij që të mos bojkotojnë asnjë seancën të Kuvendit, mirëpo ka shtuar se vendimin për mospjesëmarrje është në “duart” e koalicionit ndërmjet tri partive. /tesheshi.com/
