Kryeministrat e vendeve të Ballkanit Perëndimor do të takohen në një takim informal në Durrës në 26 gusht, me temë “thellimi i integrimit rajonal, me fokus në ekonomi dhe tregti”.
Në këtë takim do të marrin pjesë Kryeministrja e Serbisë Ana Brnabiç, ai i Kosovës Isa Mustafa, Kryetari i Këshillit të Ministrave të Bosnjes Denis Zvizdiç, kreu i qeverisë së Maqedonisë Zoran Zaev, ai i Malit të Zi, Dushko Markoviç, si dhe Komisioneri Johannes Hahn dhe zv. Presidenti i Bankës Botërore për Europën dhe Azinë Qendrore, Cyril Muller.
Takimi do të përbëhet nga sesione të ndryshme pune, gjatë së cilave do të diskutohen tema si tregtia, shërbimet, investimet dhe ekonomia digjitale. Kryeministrat e Ballkanit Perëndimor pritet të shprehin angazhimin maksimal në drejtim të zbatimit të Planit Shumëvjeçar të Veprimit për Zonën Ekonomike Rajonale për të cilën u ra dakord në Samitin e Triestes. /tesheshi.com/
