Ulja në një tavolinë në Vjenë e krerëve të diplomacive të SHBA-ve, Rusisë, Turqisë dhe Arabisë Saudite nuk ka sjellë asnjë zhvillim të ri, duke vënë në pah edhe njëherë mospajtimet mes tyre për luftën në Siri.
Siç mësohet, temë kryesore në takimin e së premtes ka qenë e ardhmja politike e shefit të regjimit sirian, Beshar Esadit.
Teksa pala ruse i qëndron pikëpamjes se Esadi duhet të mbetet pjesë e procesit politik, shefat e politikës së jashtme amerikane, turke dhe saudite e shohin atë si një pengesë për paqen, dhe mendojnë se ai duhet të largohet nga pushteti në mënyrë që t’i jepet fund luftës.
Ndërkaq, e përditshmja ruse Kommersant pretendon habitshëm se Beshar Esadi do ta lajmërojë shpejt dorëheqjen e tij nga posti i presidentit të Sirisë.
Sipas gazetës ruse, pas takimit të Putinit me Esadin, ky i fundit është pajtuar të bëjë shpejt një deklarim publik. Gjatë vizitës në Kremlin, vijon të pretendojë gazeta, Esadi ka pranuar një proces politik për zgjidhjen e krizës siriane, dhe ai do ta bëjë të ditur pranimin prej tij të zgjidhjes së propozuar politike të krizës, për të shpallur dhe dorëheqjen.
Veç Kommersant-it, deri tani nuk ka ende një mjet tjetër informimi që ta pohojë këtë lajm. /tesheshi.com/
