Këshilli i Sigurimit i Kombeve të Bashkuara miratoi një përjashtim të përkohshëm nga sanksione për zyrtarët e Koresë së Veriut të cilët duhet të marrin pjesë në takimin e pritshëm historik mes presidentit të tyre Kim Jong-un dhe atij amerikan Donald Trump, me 12 qershor në Singapor.
Ka qenë kërkesa e Singaporit që i është drejtuar Këshillit të Sigurimit me një letër ku thuhet se samiti është një mundësi për të promovuar zgjidhjen paqësore të çështjes bërthamore dhe vendosjen e paqes dhe stabilitetit në Gadishullin Korean e rajon.
Koreja e Veriut është nën sanksionet OKB-së prej programeve bërthamore dhe ato përfshijnë ngrirjen e aseteve dhe ndalimin e udhëtimit për dhjetra individë të lidhur me programin. Bëhet fjalë për 80 sosh.
E njëjta praktikë u ndoq dhe në rastin e delegacionit të Koresë së Veriut që do të udhëtonte drekt Koresë së Jugut për të hapur Olimpiadën Dimërore.
Është ende e paqartë nëse do të mbahen dy takimet e presidentëve, pasi Koreja e Veriut ka thënë se nuk është gati për një braktisje të njëanshme të armëve bërthamore.
Presidenti amerikan nga ana e tij tha të martën se lideri i Koresë së Veriut Kim Jong-un është treguar “serioz”, në mënyrën se si duhet ta largojë vendin nga armët bërthamore, por nuk përjashtoi mundësinë për të shtyrë takimin e tyre historik. /tesheshi.com/
