Pas përjashtimit nga grupi parlamentar socialist, Saimir Tahiri është “nxjerrë jashtë” dhe nga selia e PS-së. Atij i janë marrë dy postet partiake që mbante, kryetar i degës së Tiranës dhe koordinator i bashkëqeverisjes me popullin, duke iu dhënë këto përkatësisht Blerina Gjylametit dhe Elisa Spiropalit.
Ngjashëm u veprua kështu dhe me Koço Kokëdhimën, afro një vit më parë, kur pasi iu hoq mandati i deputetit nga Kushtetuesja, iu hoqën dhe postet që mbante në parti.
Por ky “përjashtim” i Tahirit konsiderohet si i përkohshëm, derisa ndaj tij të përfundojnë hetimet, prej të cilave ai pretendon të dalë i pastër, për t’iu rikthyer sërish politikës.
Fjalëve se karriera e tij tashmë ka përfunduar, pavarësisht rezultatit final të hetimit, nëse është përfshirë ose jo në trafik droge me kushërinjtë e largët Habilaj, Tahiri është përgjigjur të hënën mbrëma përballë Sokol Ballës në shtëpinë e tij, se këtë e vendos ai dhe vetëm ai, e askush tjetër.
Por sërish ngjashëm me Kokëdhimën, dallohet mes tij dhe Ramës një ftohje dhe një largim i ndërsjelltë.
Për koiçidencë, që të dy ishin miqtë e bashkëpunëtorët për kokë të Ramës, e po ashtu që të dy më të sulmuarit nga opozita. /tesheshi.com/
