Krerët e Ministrisë së Brendshme kanë siguruar turistët se ata do të jenë të sigurtë në zonën e Dukagjinit.
Ndërkohë që Ministri I Brendshëm, Sajmir Tahiri, ka falënderuar policinë për “arrestimin rekord” drejtori I Policisë së Shtetit ka qenë më I detajuar.
Në postimin e tij, Tahiri falenderon forcat e policisë dhe banorët e Dukagjinit. Ministri i Brendshëm shprehet se personi i arrestuar ndoshta duhet të ishte në burg për krimet e mëparshme.
“Faleminderit policisë dhe banorëve të Dukagjinit për arrestimin në kohë rekord të njeriut që ndoshta duhet të ishte ende në burg për krimet e mëparshme, e jo të vriste përsëri”, shkroi Tahiri në “Facebook”.
Drejtori i Përgjithshëm i Policisë së Shtetit, Haki Çako, pas arrestimit të autorit të dyshuar të vrasjes së turistëve çekë, falenderoi banorët e Grudës së Re për ndihmën që i dhanë policisë në arrestimin e Sokol Mjacajt.
“Falenderoj të gjithë banorët e Grudës së Re që na ndihmuan në izolimin e tij në kohë rekord. Falenderoj dhe të gjithë efektivët e policisë, të cilët kanë 48 orë pa pushuar”, tha Çako.
“Është një ngjarje e rëndë, por dua të siguroj të gjithë shtetasit e huaj që vijnë për turizëm se do të jenë të sigurtë në vendin tonë. Do të marrim masa për të siguruar jetën e turistëve në të gjithë Shqipërinë”, tha drejtori i Policisë së Shtetit. /tesheshi.com/
