Ka qenë maratonë takimi i mbrëmshëm mes dy krerëve të koalicionit qeveritar, Edi Rama-Kryeministër dhe Ilir Meta-kryetar Kuvendi.
Burime brenda mazhorancës bëjnë të ditur për tesheshi.com se bëhet fjalë për një takim tejet të tensionuar dhe që ka qenë në një farë mënyre sulmi final i Ilir Metës për të realizuar objektivin e tij politik: ta dërgojë aleatin-rival të tij në zgjedhjet e 2013-ës pa “faktorin plus” që i dha fitoren në Dibër: PDIU-në.
Siç mësohet, Edi Rama i ka kërkuar Metës llogari se përse ka ndikuar te kryeprokurori për një hetim të dytë ndaj Saimir Tahirit, i cili mund të rrezikojë seriozisht këtë herë arrestin e ministrit të Brendshëm, në lidhje me tenderin e veshjeve të Policisë së Shtetit.
Ndërsa hetimi i parë mbi pajisjen përgjuese ishte shumë i koklavitur dhe mund të konsiderohet gjysëm politik, ky i fundit flet për para dhe tendera, çka e bën fabulën edhe më të besueshme.
Në takimin e mbrëmshëm, Meta i ka kërkuar Ramës që të mos humbë qetësinë pasi nuk bëhet fjalë sipas tij për prapaskena, që sipas kreut të Kuvendit i kanë ardhur nga kreu i qeverisë.
Kryetari i LSI-së ka përmendur “fabulën” e “kokës së tij në tepsi” të ndërkombëtarëve si “kurban” për hapjen e negociatave për anëtarësim me Bashkimin Europian.
Por presioni ndaj Tahirit ka qenë i fortë dhe final duke i kërkuar Edi Ramës të marrë masa se nuk mundet që mazhoranca të mbajë përgjegjësinë për mbrojtjen e një ministri nën hetim.
Dhe në këtë atmosferë të tensionuar, Edi Rama i ka përmendur aleatit të tij sulmet verbale të këshilltarëve të Metës ndaj Sajmir Tahirit thuajse çdo ditë në media.
Në fund takimi është mbyllur jo vetëm pa asnjë rezultat por me kërcënimin nga Meta se një sërë skandalesh do të shpërthejnë kundër qeverisë nëse Rama nuk do të marrë masa apo do të komplotojë.
Dhe menjëherë pas këtij takimi, Meta është takuar me ish-presidentin Rexhep Meidani, i cili ka botuar sot një shkrim ku thekson se është e pamundur që PS të arrijë 71 vota në zgjedhjet e ardhshme vetëm në aleancë me PDIU-në e Shpëtim Idrizit, ashtu sië u eksperimentua në Dibër.
Por Rama ka bërë të ditur se do të vazhdojë planin e tij. Ndaj, për ta ndaluar duket se është vënë në përdorim kryeprokurori në ikje, Adriatik Lalla, i cili ka hapur një hetim të fortë ndaj ministrit të Brendshëm.
Task-Forca e Prokurorisë ka nisur ditët e fundit një hetim për tenderin e Ministrisë së Brendshme për uniformat e policisë.
Bëhet fjalë për një tender të zhvilluar në vitin 2015 me një vlerë prej 1 miliard lekësh. Sipas informacioneve, për këtë rast nuk ka pasur asnjë kallëzim penal, por hetimet kanë nisur kryesisht, pas deklaratave në media në atë kohë se mund të jetë abuzuar. Prokuroria ka parë faktet paraprake dhe i ka lindur dyshimi se mund të ketë në të vërtetë abuzim dhe për këtë arsye ka nisur një hetim të imtësishëm.
Hapja e një hetimi të tillë në një periudhë kur dhe po afron reforma në drejtësi dhe marrëdhëniet e qeverisë me kryeprokurorin janë jo fort të mira, tregon për një përplasje të fortë mes tyre.
Sipas organit të Akuzës, Komisioni i Vlerësimit të Ofertave pranë Ministrisë së Brendshme ka hapur dy herë procedurat e tenderimit për uniformat, fillimisht më 6 nëntor të 2015, ku brenda ditës është anuluar kjo procedurë, për të vazhduar dy muaj më pas, në dhjetor të 2015, ku edhe është shpallur fituese kompania turko-shqiptare si fitues e tenderit me vlerë rreth 1 mld lekë. Sipas vendimit të shpalljes së fituesit, kompani shqiptare “Marsi & AL” dhe ajo turke “Yakupoglu Tekstil”, është renditur si ofertuesja me çmimin më të ulët për dizajnin dhe qepjen e 27 mijë e 900 copë uniforma të ndryshme të policisë. Por dyshimet janë ngritur dhe për shkak të cilësisë së uniformave. Edhe tani nëse vihet re, uniformat e policisë janë zbardhur nga dielli, duke treguar për një cilësi jo fort të mirë. Gjithashtu, mësohet se nga verifikimi në dogana, ka rezultuar se këto uniforma nuk janë prodhuar në Turqi siç janë raportuar nga ministria apo edhe nga kompania fituese e tenderit, pasi në asnjë rast nuk janë gjetur fatura doganore të hyrjes së këtyre uniformave të policisë. Dyshimet e Prokurorisë janë se uniformat mund të jenë prodhuar në vendin tonë. /tesheshi.com/
