Ministri i Rendit, Saimir Tahiri u kërkoi kompanive private të sigurimit që t’u risin pagat policëve, pasi përndryshe do iu hiqet licensa.
Sipas tij, këto kompani janë shndërruar në strehë skllevërish.
“Policitë private nuk mund të jenë foletë ku strehohen njerëz që shfrytëzohen si skllevër. Ne do bëjmë gjithçka është e mundur që brenda një kohe shumë të shkurtër, shumë, shumë të shkurtër të detyrojmë çdo kompani, çdo polici private që të paguajë pagën sipas ligjit për çdo polic privat. Asnjë lek më pak se sa ç‘është parashikuar në ligj. Asnjë lek më pak sesa 330 mijë lekë që është paga e parashikuar në ligj. Na ndihmoni ju, ta bëjmë realitet këtë me informacion apo denoncime atëherë kur pronari apo administratori i kompanisë nuk e respekton këtë detyrë ligjore. Dhe ne do bëjmë maksimumin deri në heqjen e licencës për ato kompani që të respektohet ligji dhe kriteri. Të respektohet gjithçka kemi parashikuar në ligj. Kjo do të jetë beteja jonë e përbashkët. Beteja jonë pa asnjë diskutim dhe beteja juaj dhe e çdo polici privat, e secilit prej 9000 policëve privatë në Republikën e Shqipërisë”, u shpreh Tahiri.
Reagimi i tij vjen si pasojë e disa ngjarjeve në vazhdimësi, e sidomos asaj të fundit, ku në mes të ditës u vodhën miliona të një banke gjatë transportit. Më pas rezultoi se një ndër kokat e grupit ishte vetë polic privat. /tesheshi.com/
