Saimir Tahiri ka propozuar një masë të re dënimi për ata që do të shpallen fajtor për vrasje ndaj policëve dhe grupeve të krimit të organizuar. Bëhet fjalë për atë që ka vendosur gjykatësi Giovani Falcone në Itali, kur ishte zyrtar në Ministrinë e Drejtësisë, pak para se të vritet.
Pra do të ketë të ashtuquajturin “burg të ashpër” për të gjithë kriminelët që merren me trafik dhe kultivim droge apo janë pjesëtar të grupeve kriminale të lidhura me mafien. Sipas të gjitha gjasave të gjithë personat e rreszikshëm nuk do të jenë në burg me të tjerët por do të vendosen në burgje të veçantë të rezervuar vetëm për “peshkaqenë”. Në vende të ndryshme, këto burgje janë në ishuj, kurse tek ne Sazani është kthyer në zonë turistike.
Në Komisionin e Sigurisë Kombëtare, Tahiri ka paraqitur dy propozime per ndryshime ligjore per ashpersimin e politikave penale. Ai ka kërkuar regjim më të ashpër në burgje për personat me rrezikshmëri të larte dhe e dyta, ndryshim në Kod, për bashkimin mekanik të vendimeve për një të dënuar.
Këto propozime Ministri i Brendshëm i bëri gjatë raportimit të tij para Komisionit të Sigurisë.
Tahiri ka raportuar në komisionin parlamentar të sigurisë kombëtare lidhur me ngjarjet e ndodhura së fundmi në Lazarat.
Në fjalën e tij, duke iu përgjigjur akuzave të deputetëve të opozitës se në fshatin jugor të vendit policia dhe RENEA ndërhynë pa plan veprimi, Tahiri ka thënë se, kriminaliteti i krijuar ndër vite në Lazarat nuk mund të asgjesohej për një vit, pavarësisht rezultatit të suksesshëm të arritur në operacionin e vitit të kaluar.
“Në Lazarat ishte krijuar një kriminalitet masiv. Vitin e kaluar policia i dha fund kultivimit masiv të drogës, vlera e të cilës arrinte në disa miliardë euro. Me paratë e drogës korruptohej Policia e Shtetit, drejtësia dhe vendimmarrja politike”, ka thënë Tahiri.
Ministri ka theksuar se, kur qeveria aktuale erdhi në pushtet gjeti një Shqipëri të zhytur në kultivimin e narkotikëve, gjë që sipas tij kishte pasoja të rënda në sigurinë publike, drejtësinë dhe politikën.
“Fluksi kriminal i atyre përmasave nuk mund të gjente zgjidhje pa operacionin e vitit që kaloi”, ka theksuar Tahiri, i cili sa i takon ngjarjeve të fundit, ku humbi jetën efektivi i RENEA-s, Ibrahim Basha, ka thënë:
“Ajo që ndodhi ishte një ngjarje e rëndë, por që gjeti zgjidhjen e duhur me arrestimin e të dyshuarve. Ajo ishte diçka e organizuar dhe policia nuk kishte informacion as nga SHISH, por mori zgjidhjen më të shpejtë të mundshme”, ka shtuar Tahiri. /tesheshi.com/
