Hiç më pak se 2600 policë janë të angazhuar nga autoritetet maqedonase për të ruajtur sigurinë dhe rendin gjatë ndeshjes së Superkupës, Real Madrid-Manchester United, që pritet të zhvillohet snë ora 20:45.
Ministria e Punëve të Brendshme ka njoftuar se kanë ndërmarrë të gjitha masat që organizimi i ndeshjes të kalojë sa më mirë. Kështu ata kanë apeluar deri te shikuesit që të kenë kujdes me gjësendet të cilat do t’i marrin me vete.
“U apelojmë qytetarëve që të mos marrin me vete shkrepsa, para, shishe dhe mjete të forta. Me rekomandim të UEFA-së është e lejuar që në stadium të futen vetëm flamuj të Realit, Manchester-it, Anglisë dhe Spanjës”, kanë thënë nga MPB.
Për punën korrekte dhe gatishmërinë e autoriteteve të sigurisë dëshmon edhe rasti i fundit me ç‘rast policia ka njoftuar se ka arrestuar një 41-vjeçar, i cili ka tentuar të shesë bileta në formë ilegale me çmim të shtrenjtë.
Ky i dyshuar ka shkuar shumë larg duke reklamuar biletat në internet me çmim deri 600 euro. Ai ka tentuar të shesë dy bileta, duke lënë numrin e telefonit për kontakt dhe adresën e tij, me çka organet shtetërore kanë arritur ta gjejnë dhe e kanë arrestuar.
Ndonëse ndeshja finale e Superkupës fillon në orën 20:45, dyert e stadiumit do të hapen tre orë më parë me qëllim shmangjen e rrjetit për sigurinë e kontrollit.
M.Krasniqi – /tesheshi.com/
