Dy persona të armatosur me armë dhe bomba sulmuan pak më parë ndërtesën e Drejtorisë së Sigurimit në Stamboll. Forcat policore në vendngjarje iu kundërpërgjigjën zjarrit, duke lënë të vdekur njërin prej terroristëve, që nga sa raportohet është femër. Ndërkohë, personi tjetër sapo është arrestuar, pasi mundi të largohej nga vendi i ngjarjes. Në shkëmbimin e zjarrit kanë mbetur të plagosur dy forca policore.
Terroristja e vrarë gjendet e shtrirë para ndërtesës në këto momente, dhe e tërë zona në Vatan Caddesi është e rrethuar.
Një varg incidentesh kanë ngjarë prej dje në Turqi. Një prokuror u mor peng në Stamboll, dhe më pas vdiq nga plagët. I tërë vendi mbeti po dje pa drita, pas një shkëputjeje të çuditshme të energjisë elektrike.
Presidenti Erdogan u detyrua të ndërpresë vizitën në vendet e Ballkanit, teksa tensioni është i lartë në Turqi.
