Një sulm kimik në Siri që ka lënë pas dhjetëra të vdekur e të plagosur e ka bërë Këshillin e Sigurimit që të thërrasë këtë të mërkurë një takimi të jashtëzakonshëm.
I thirrur nga Franca dhe Britania, ky takim reflekton reagimin ndërkombëtar ndaj një sulmi të tillë, të mohuar nga regjimi sirian.
“Ky është qartas një krim lufte…,” u tha gazetarëve në Nju-Jork ambasadori i Britanisë në OKB, Matthew Rycroft.
Ndërkaq, mësohet se SHBA-ja, Franca dhe Britania kanë propozuar një rezolutë të Këshillit të Sigurimit, për të cilën ka të ngjarë të kërkohet një votim.
Al Jazeera flet për më së paku 72 viktima, mes të cilëve 11 fëmijë, nga sulmi kimik në Han Shejhun, në provincën e Idlibit, një ditë më parë, e për 550 të lënduar.
Ushtria siriane nuk pranoi që të ketë kryer një sulm të tillë as dje, e as në një moment përgjatë konfliktit.
SHBA-ja kërkoi vënien e Assad-it para përgjegjësisë për sulmet kimike ndërsa sekretari amerikan i Shtetit deklaroi se, “Eshtë e qartë se kjo është mënyra si vepron Bashar Assad-i, me barbarizëm brutal.”
Masakër ishte cilësimi që i bëri ngjarjes presidenti francez, Francois Hollande.
Në reagimin e tij, kryeministri turk, Binali Yıldırım, do të thoshte, “Mizoria në Idlib na tronditi thellë të gjithë.”
Siria është akuzuar dhe më herët për sulme me armë kimike mbi qytetarët e saj në zonat e kontrolluara nga kryengritësit. /tesheshi.com/
