Të paktën 53 civilë kanë humbur jetën në sulmet ajrore ruse në fshatin lindor sirian Al-Shafah. Lajmin e bën të ditur një grup monitorimi për konfliktin. Observatori Sirian për të drejtat e njeriut me seli në Londër thotë se 21 nga ata që raportohen se janë vrarë mëngjesin e së dielës, janë fëmijë.
Fshati ndodhet në provincën Deir al-Zour, një nga të fundit ku ISIS mban territore. Fillimisht u raportua për 34 të vrarë, por pas një ditë të gjatë operacionesh për kontrollin e rrënojave dhe nxjerrjen e të mbijetuarve, bilanci u rëndua.
Më herët, Rusia konfirmoi se gjashtë bombardues me rreze të gjerë kishin ndërmarrë sulme ajrore në zonë, mirëpo rusët thanë se ata kishin goditur militantët dhe bastioned e tyre. Rusia mbetet aleatja kyçe e presidentit sirian, Bashar al-Assad në vendin e shkatërruar nga vite të gjata lufte civile.
Bisedimet e paqes të mbështetura nga OKB pritet të rinisin në Gjenevë, javën e ardhshme, por disa raunde negociatash tashmë kanë dështuar. /tesheshi.com/
