Një sulm i rëndë me bombë ka ndodhur në kryeqytetin e Afganistanit, kur një makinë me eksploziv ka shpërthyer në mes të një autokolone të mbushur me material luftarak.
Agjencia e lajmeve Reuters, theskon se përveç 3 kontraktorëve amerikanë, ka pasur 12 viktima civile.
Agresori drejtoi mjetin e tij drejt një kamioni me armatime që i përkiste kontraktorit amerikan “DynCorp International”, që në momentin para shpërthimit ishte i hapur dhe pas tij mbeti i shkatërruar totalisht. Dhjetëra mjete të tjera u shkatërruan pranë vendit të ngjarjes nga forca e shpërtimit, përfshi edhe një furgon që përdorej për transport nxënësish shkolle.
Një kontraktor amerikan u vra në momentin e shpërthimit të bombës, ndërsa dy të tjerë ndërruan jetë nga plagët e marra, bëri të ditur koalicioni i NATO-s, duke mos i identifikuar ata. Ambasada e Shteteve të Bashkuara në Kabul dënoi sulmin me bombë.
“Shtetet e Bashkuara mbeten të angazhuara në ndihmën ndaj partnerëve tanë afganë, në përpjekjet e tyre për të siguruar një të ardhme të paqtë për Afganistanin”, lexohej në deklaratën e ambasadës së SHBA-ve.
Kontraktorë si “DynCorp”, që është e përfshirë prej një kohe të gjatë në luftën e Afganistanit dhe që ofronte truproja për Presidentin e fundit të vendit, kanë qenë në mënyrë të vazhdueshme objektiva të talebanëve. Katër punonjës të këtij kontraktori u vranë gjatë një sulmi të ngjashëm vdekjeprurës në Kabul gjatë vitit 2013.
Sulmet me bomba në Kabul janë shtuar së tepërmi, që kur qeveria dhe talebanët konfirmuan në korrik se kreu i talebanëve, Mullah Omar kishte ndërruar jetë dy vite më parë, duke i dhënë një goditje shpresave të kryengritësve për një rikthim të shpejtë në tryezën e negociatave.
/tesheshi.com/
