Qeveria suedeze po shfaq shenja reflektimi mbi aktin e djegies së Kur’anit, ku drejtësia e saj i jep të drejtë si akt në emër të lirisë së shprehjes, një absurd në të gjitha kuptimet, aq më tepër kur vetë shteti shprehet teorikisht kundër në qëndrim.
Kështu, Suedia njofton se po shqyrton një ndalim të djegies së Kur’anit dhe librave të tjerë të shenjtë, tha ministri i Drejtësisë Gunnar Strommer për gazetën Aftonbladet të enjten.
Mu në ditën e Kurban Bajramit, një emigrant irakian në Suedi i vuri zjarrin librit të shenjtë të Islamit përpara një xhamie në Stokholm, duke provokuar indinjatë te muslimanët në mbarë botën. Ky akt u dënua madje edhe nga Papa Françesku.
Në fillim të këtij viti, policia hodhi poshtë disa raporte për akte që përfshinin djegien e Kur’anit, duke përmendur shqetësimet e sigurisë, por gjykatat anuluan vendimet e policisë, duke thënë se ishte kundër ligjeve suedeze për lirinë e shprehjes.
Ministri suedez i drejtësisë tha të enjten se qeveria po analizon situatën dhe nëse ligji duhet të ndryshohet potencialisht.
“Ne duhet të pyesim veten nëse rendi aktual është i mirë apo nëse ka arsye për ta ndryshuar atë”, tha Strommer.
E megjithatë, si shkak merret siguria e vendit e jo aspekti moral.
Ai shtoi se Suedia ishte bërë një “objektiv prioritar” për sulme.
“Ne shohim se djegia e Kur’anit të javës së kaluar gjeneroi kërcënime për sigurinë tonë të brendshme,” paralajmëroi ai.
Ky akt dëmtoi gjithashtu kandidaturën e Suedisë për anëtarësim në NATO.
Presidenti turk Rexhep Tajip Erdogan tha se Suedia nuk mund të bëhet anëtare derisa të ndalojë cenimin e librit të shenjtë. /tesheshi.com/
