Presidenca e Bashkimit Evropian njoftoi të premten se shtetet anëtare dhe Parlamenti Evropian arritën marrëveshje për mobilizimin urgjent të gjysmë miliard euro nga buxheti për zbatimin e Ligjit për Mbështetjen e Prodhimit të Municionit.
Marrëveshja pasoi vendimin e liderëve të BE-së në mars për të rritur furnizimet emergjente me municion në Ukrainë, raporton AP.
Presidenti ukrainas Volodymyr Zelensky po kërkon vazhdimisht ndihmë ushtarake shtesë nga BE.
Akti për Mbështetjen e Prodhimit të Municioneve është pjesë e një plani për të dërguar një milion copë municione artilerie në Ukrainë gjatë 12 muajve të ardhshëm.
Dhe SHBA do të dërgojë municione thërrmuese
Bashkimi Evropian ka miratuar tashmë një plan për procedurat e përshpejtuara të prokurimit kur miratoi fondet për të rritur prodhimin në objektet dhe fabrikat e BE-së.
“Kjo është një tjetër dëshmi e angazhimit të palëkundur të BE-së për të mbështetur Ukrainën, për të forcuar mbrojtjen, bazën teknologjike dhe industriale të BE-së dhe përfundimisht për sigurimin afatgjatë dhe mbrojtjen e qytetarëve të BE-së,” tha Ministrja e Mbrojtjes Margarita Robles e Spanjës, e cila aktualisht mban presidencën europiane.
Marrëveshja duhet të miratohet edhe një herë nga vendet anëtare dhe PE, njoftoi presidenca spanjolle, por procedura nuk duhet të shkaktojë probleme të mëdha dhe duhet të përfundojë deri në fund të muajit.
Shtetet e Bashkuara pritet të njoftojnë të premten se do të dërgojnë mijëra municione thërrmuese si pjesë e një pakete të re ndihme ushtarake prej 800 milionë dollarësh në Ukrainë, thanë burime të paidentifikuara. /tesheshi.com/
