Nga Mensur Krasniqi
Derisa gjithkush shpenzon për t’u martuar, beqarët e qytetit të Negotinës në Maqedoni për këtë gjë do shpërblehen nga komuna e tyre.
Kjo komunë ka vendosur t`u ndajë nga 500 euro beqarëve mbi 40 vjeç nëse ata martohen; mirëpo këtë lloj subvencioni të rrallë do ta përfitojnë vetëm ata të cilët nuk kanë lidhur kurorë asnjëherë, pra nuk e kanë shijuar martesën.
Vlen të theksohet se në këtë qytet mbi 90 përqind e popullatës i përkasin përkatësisë maqedonase; ndërse me status entik “shqiptar” janë vetëm nuse të ardhura nga Shqipëria, të cilat kanë lidhur kurorë me maqedonas, siç pohojnë banorë të këtij qyteti.
Ndërsa kryetari i komunës, Vanqo Apostolov, duke vlerësuar rëndësinë e familjes si bashkësi, e aq më shumë shtimin e trashëgimisë kombëtare, ka propozuar këtë masë shpërblyese me nga 500 euro si stimulim për të gjithëbeqarët në moshë të kësaj komune, vetëm vetëm që ata të martohen, e mos mbeten qyqarë.
“Ka një numër të madh të meshkujve të moshuar në qytetin e Negotinës që ende janë në dilemë për të filluar një jetë familjare, dhe komuna jonë ka vendosur që t’u japë një stimul të vogël, gjegjësisht nga 500 euro nëse lidhin kurorë. Kjo nuk vlen vetëm për ata që më parë kanë prishur ndonjë kurorëzim. Edhe pse nuk bëhet fjalë për një shumë të lartë të hollash, megjithatë shpresohet që këto mjete financiare do të ndikojnë sadopak për të nxitur beqarët që të martohen”, shprehet ai.
Apostolov shton se si komunë, prej dy vitesh jepen stimuj financiarë dhe për shtimin e natalitetit, pasi si tek shumë popuj sllavë të rajonit, veçanërisht serbët, edhe tek maqedonasit po shënohen ritme të frikshme të uljes së lindshmërisë, duke e katandisur popullsinë e tyre si tejet të mplakur.
“Ne si komunë qe dy vite kemi filluar të dhurojmë nga 120 euro për çdo fëmijë të sapolindur, ndërsa për çdo fëmijë të tretë asaj familje u japim nga 200 euro”, saktëson Apostolov.
Siç thekson kryetari i kësaj komune, ndjehet i kënaqur që nataliteti në këtë rajon është rritur për 19 përqind, meqë në gusht të vitit të kaluar kishin 176 foshnje të lindura, ndërsa këtë viti ky numër është rritur në 210.
500 euro shpërblim për kokë, për të gjithë ata 40-vjeçarë që martohen, është një ofertë e pritur mirë. Negotinasit e thonë se shumë beqarë të kaluar në moshë të qytetit kanë dhënë shumë më shumë se 500 euro vetëm që të martohen, duke sjellë dhe nuse nga Shqipëria, e jo më të ndodh e kundërta që t`ua dhurosh 500 euro për të lidhur kurorë.
“Tani jo vetëm se do na mbesin të hollat që i kemi planifikuar për të “blerë” nuse nga fshatrat e Shqipërisë, mirëpo edhe do fitojmë të holla që të bëjmë dasëm”, thonë disa negotinas që i kanë zënë të katërdhjetat pa u martuar fare.
Përveç Negotinës, numër të madh të beqarëve në moshë ka dhe në fshatrat tjera rreth këtij qyteti, që siç thuhet në gjuhën e shqiptarëve, “jetojnë në të thatë”. /tesheshi.com/
