Sipas një studimi të Institutit për Demografi në Vjenë, në vitin 2046 çdo i tretë banor në kryeqytetin austriak do të mund të ishte musliman. Studimi ka konfirmuar një rritje të konsiderueshme të numrit të muslimanëve në Austri, ku aktualisht janë rreth 700.000 njerëz deklarohen se i takojnë fesë islame.
Nën moton “Demografia dhe feja në Austri”, studimi u morr me situatën aktuale në lidhje me përkatësinë fetare të popullsisë, si dhe zhvillimet e mundshme demografike. Që nga regjistrimi i fundit në vitin 2001, përqindja e muslimanëve në popullatën austriake është dyfishuar nga 4 në 8 për qind.
Komuniteti fetar më i madh vijon të mbetet ai katolik, së cilës i takojnë dy të tretat e austriakëve, ose 5,160.000 banorë.
Megjithatë, në 15 vitet e fundit është reduktuar numri i katolikëve romakë duke u rritur ai i agnostikëve, të cilët tani përbëjnë 17 për qind të popullsisë. Gjithashtu është dyfishuar numri i besimtarëve ortodoksë nga 2 deri në 5 për qind, ku regjistrohen gjithsej 400.000 ndjekës të kësaj feje.
Pjesa e evangjelistëve 15 vitet e fundit ka mbetur e pandryshuar, në 5 për qind, ndërsa numri i hebrenjve në Austri është 15.000 sosh.
Hulumtuesit besojnë se ekzistojnë katër skenarë të mundshëm të zhvillimit fetar të banorëve të Austrisë, dhe që të katër llogarisin një rritje të ngadalshme të numrit të muslimanëve dhe agnostikëve, me një ulje të mëtejshëm të numrit të katolikëve.
Nëse në të ardhmen vazhdon emigrimi nga kontinenti evropian për në Austri, kjo do të nënkuptonte një rritje të mëtejshme të numrit të agnostikëve deri në një të katërtën e popullsisë së përgjithshme, dhe arsyeja për këtë është trendi i tanishëm në shumicën e vendeve evropiane.
Një skenar i tillë do të nënkuptonte që pjesa katolike në Austri në vitin 2046 të jetë 45 për qind, ndërsa ajo muslimane rreth 14 për qind.
Skenari i dytë merr parasysh zhvillimet aktuale të migrimit, respektivisht emigracionin nga vendet jashtë kontinentit evropian, që ka të bëjë me prurjet nga Lindja e Mesme.
Ngjashëm me skenarin e parë, edhe në këtë rast, do të kishim zvogëlim të numrit të katolikëve në 45 për qind,rritje të numrit të agnostikëve në 24 për qind dhe rritje të muslimanëve në 17 qind.
Nëse në të ardhmen, emigracioni nga vendet e tjera në Austri do të shënonte rënie ose do të mbetej në nivelin aktual, zhvillimi i mëtejshëm do të varej nga norma e lindjeve.
Në këtë skenar, pjesa e agnostikëve në vitin 2046 do të ishte rritur në 28 për qind, ndërsa numri i katolikëve do të kishte rënë nën 50 për qind, ndërsa prania e muslimanëve në popullatë do të ishte 12 për qind. Skenari i fundit supozon migrime të mëdha nga Lindja e Mesme dhe Afrika, që do të rezultonte me një rritje të konsiderueshme të numrit të muslimanëve në popullatën e Austrisë në 21 për qind deri në vitin 2046.
Në Vjenë, sipas kësaj hipoteze, çdo i treti banor, apo 30 për qind, do të mund të ishte musliman, dhe kështu muslimanët për 30 vjet do të bëheshin komuniteti më i madh fetar në kryeqytetin austriak. /tesheshi.com/
