Pavarësisht pohimit se mjekra nuk është më moderne dhe cool, ka shumë njerëz të cilët ende i mbajnë ato për arsye të ndryshme, kurse hulumtimet e fundit tregojnë se mjekra sjell edhe përfitime të shumta shëndetësore.
Përveçse është vërtetuar shkencërisht se mjekra i bën meshkujt më tërheqës, hulumtimi ka zbuluar se mjekra ka dhe përfitime të mëdha shëndetësore.
Mjekra mund t’ju mbrojë nga 90-95 për qind e rrezeve të dëmshme UV me një UPF (faktor të mbrojtjes UV) deri në 21, e zbuluar kjo nga një studim i profesorëve në Universitetin e Queensland, shkruan prestigjiozja britanike The Independent.
“Ndërsa mjekrat kurrë nuk do të jenë aq të sigurta sa kremrat kundër diellit, ato pa dyshim janë një faktor në bllokimin e rrezeve UV”, shpjegoi në studim autori kryesor, profesor Parisi.
Ekspozimi i ulët ndaj rrezeve UV do të thotë gjithashtu se mjekrat ngadalsojnë procesin e plakjes, duke mbajtur lëkurën e mbrojtur rinore dhe pa rrudha. Përveç kësaj, personat me mjekra gjithashtu kanë më pak të ngjarë të preken nga kanceri i lëkurës.
“Ekspozimi ndaj diellit është shkaku kryesor i plakjes dhe i dëmtimit të lëkurës, dhe për këtë arsye pretendimet se mjekra e mbron lëkurën nga plakja ka kuptim. Kjo do të thotë më pak rrudha dhe njolla të plakjes të cilat shfaqen shpesh në fytyrë”, tha dr. Adam Freidmann.
I njëjti përfundim vlen edhe për ata persona me shumë flokë në kokat e tyre, shpjegoi Freidmann.
“Njerëzit me flokë të dendura në kokë nuk kanë tendencë që të preken nga kanceri i lëkurës ose plakja e lëkurës së kokës, deri sa të humbasin flokët e tyre. Pra mund të shohim se ka një efekt mbrojtës UV”, tha ai.
“Mbrojtja nga rrezet UV varet nga trashësia dhe densiteti i mjekrës”, tha dr. Anil për The Independent. Me fjalë të tjera, sa më e dendur mjekra, aq më mirë. “Duhet të ketë më shumë studime, por provat aktuale tregojnë se qimet e fytyrës mund të jenë mbrojtëse nga dëmtimi prej rrezeve të diellit”, thotë dr. Anil.
Studimi u krye duke përdorur manekinët që u ekspozuan ndaj diellit, disa me mjekër të plotë e të tjerë me mjekër të pjesërishme, ndërsa disa pa mjekër fare.
Shkencëtarët kanë sillur kokat, për t’u siguruar që secili manekin të jetë i ekspozuar ndaj një sasie të barabartë rrezesh dielli, pas së cilës ata kanë matur nivelet e rrezatimit që ishin absorbuar nga secili prej tyre. /tesheshi.com/
