Kryeministri Rama e nisi ditën duke u takuar me një grup studentesh në një konvikt të sapo rikonstruktuar.
I shoqëruar nga kryebashkiaku Veliaj, Rama tha se një investim i madh e pret infrastrukturën studentore. “Projekti i ndërtimit të hapësirave të reja, rekreative, apo akademike është duke u zhvilluar. Deri në fund të këtij mandati të gjithë konviktet e Shqipërisë do të jenë ndërtuar me këtë standard. Me fillimin e mandatit të ri të bashkisë së Tiranës do të ecim me punën për kampusin, investim goxha i madh, por do të bëhet, ashtu sikur do të fillojmë në fund të këtij viti investimet për laboratorët”, tha Rama.
Ndërsa referuar një zhvillimi të ditëve të fundit te Universiteti Bujqësor në Kamëz, aty ku stafi i këtij universiteti e studentë, por dhe opozita, nuk lejojnë ndërtimin e një shkolle të 9-vjeçare e të mesme te ish-fidanishtja e UBT-së, Rama tha se “kjo moda që është në krijim e sipër, por ne nuk do ta lejojmë, që unë nuk jam dakord dhe hidhem përpjetë dhe unë i bllokoj, i godas dhe përplas është barbari, jo qytetari. Kjo nuk ka nevojë për kërcënime, bojkot apo bllokim, gjërat diskutohen”. /tesheshi.com/
