Sekretari i Përgjithshëm i NATO-s, Jens Stoltenberg tha në Zagreb të mërkurën se Maqedonia Veriore do të bëhet anëtari i 30-të i Aleancës së Atlantikut të Veriut brenda disa javësh.
“Ne e mirëpresim faktin se Kroacia ka qenë një mbështetëse e fortë e politikës së dyerve të hapura të NATO-s,” u tha Stoltenberg gazetarëve në Zagreb pas takimit me Presidentin kroat Zoran Milanoviç, vendi i të cilit mban Presidencën e BE-së.
Stoltenberg, i cili ishte në Zagreb me rastin e një takimi joformal të ministrave të mbrojtjes të BE për sfidat dhe krizat e sigurisë, gjithashtu diskutoi problemet aktuale me kryeministrin kroat Andrej Plenkoviç.
Më parë, më 11 shkurt, Parlamenti i Maqedonisë Veriore miratoi, me 114 vota pro, një ligj që ratifikon Traktatin e Atlantikut të Veriut mbi pranimin në NATO.
Ligji është vonuar dhe do të hyjë në fuqi pasi Spanja të ratifikojë Protokollin për pranimin në NATO të Maqedonisë Veriore, i cili pritet këtë muaj.
Për shkak të zgjedhjeve të parakohshme parlamentare të planifikuara për 12 Prill, u vendos që të ratifikohet Protokolli i pranimit në NATO më herët, pra para ratifikimit në të gjitha vendet anëtare të NATO-s, në mënyrë që Maqedonia Veriore të mos vonojë hyrjen në NATO për shkak të procesit zgjedhor.
Ideja e ratifikimit të kushtëzuar u vendos për herë të parë nga opozita maqedonase, duke përmendur përvojën e Malit të Zi, i cili ratifikoi dokumentet e nevojshme për anëtarësimin në NATO në prill 2017, ndërsa Hollanda dhe Spanja ratifikuan protokollin e anëtarësimit të këtij vendi në Aleancë vetëm muajin tjetër.
Kryetari i Kuvendit Talat Xhaferi tha se rruga e Maqedonisë drejt NATO-s nuk ishte aspak e lehtë.
Maqedonia Veriore ka filluar procesin e anëtarësimit në NATO në gjysmën e dytë të 2018, pasi mori një ftesë për t’u bërë anëtare e aleancës më të fuqishme ushtarake-politike në botë më 12 korrik të këtij viti në samitin e Aleancës në Bruksel. /tesheshi.com/
