Një stërvitje e përbashkët e parashutistëve të ushtrisë amerikane dhe asaj serbe do të mbahet nga 14 deri më 17 nëntor në Beograd, në aeroportin e Batajnicës, tha zëdhënësi i ushtrisë amerikane John Tomassi.
“Qëllimi i kësaj stërvitjeje, është që të zhvillohen marrëdhëniet dhe ndërveprimin midis dy vendeve tona. Gjithashtu, me këtë rast do të mbahet edhe ceremonia e shkëmbimit të simboleve parashutiste”, saktësoi zëdhënësi Tomass për Radio Free Europe.
Ai shtoi se emri zyrtar i kësaj stërvitjeje, do të jetë “Double Eagle”.
Ai tha se pjesëtarët e brigadës parashutiste 173 të Ushtrisë Amerikane nga Vicenza në Itali, parashutistët e Ushtrisë Serbe dhe dy transportues ajror C-130 nga Ramstein, Gjermani, do të marrin pjesë në stërvitjen në aeroportin Batajnicë.
Gjatë stërvitjes katër-ditore, nga e mërkura deri të premten, janë planifikuar hedhjet e parashutistëve amerikanë dhe serbë, por plani përfundimtar do të përcaktohet në përputhje me kushtet atmosferike, njoftuan në komandën evropiane të Ushtrisë Amerikane.
Kjo stërvitje ushtarake nuk është ushtrimi i parë me parashutë me SHBA. Dhjetë vjet më parë në aeroportin e Nishit, u mbajtën stërvitje të parashutistëve mes anëtarëve të Batalionit të 63-të të parashutistëve të Ushtrisë Serbe dhe Gardës Kombëtare të Ohajos.
Gjatë gjashtë viteve të fundit, Serbia ka mbajtur rreth 50 ushtrime me Shtetet e Bashkuara dhe NATO, dhe me dhjetra me Rusinë, kujton RSE. /tesheshi.com/
