Presidenti i Republikës Bujar Nishani, ka zhbllokuar vetëm pjesërisht diplomatët e propozuar nga qeveveria si ambasadorë në disa vende.
Dhe ky zhbllokim bëhet me standarde të dyfishta dhe me kritere dukshëm jo parimore.
Kështu, Nishani refuzoi dekretimin e Ermir Gjinishit, që ishte propozuar si ambasador në Arabinë Saudite, me pretekstin se zoti Gjinishi kishte punuar në organizma religjoze, ndërkohë që emëron Bardhyl Canajn si ambasador të Izraelit, ndërkohë kur zoti Canaj ka punuar për një kohë të gjatë si nëpunës i shtetit izraelit.
Më konkretisht, Bardhyl Canaj ka punuar si shef i Departamentit Ekonomik të Ambasadës së Izraelit në Tiranë.
Elementi i parë etik në emërimin e një diplomati është mospasja e konfliktit të interesit, pra të mos kesh punuar për shtetin ku shkon të përfaqësosh Shqipërinë.
Nishani, përveç Ermir Gjinishit ka refuzuar të dekretojë edhe Vizar Zhitin si ambasador në Vatikan dhe më parë gjithashtu ka refuzuar një tjetër të propozuar nga qeveria në selinë e Kishës Katolike: përkatësisht Ardian Ndrecën. Presidenti refuzoi një herë edhe dekretimin e Fatos Rekës si ambasador në Maqedoni, me arsyetimin se qeveria nuk është konsultuar me kreun e shtetit.
Por pas trazirave në Kumanovë Nishani ndryshoi mendje dhe vuri firmën për Reken.
Dekreti i tij u firmos vetëm dy ditë pas ngjarjeve në Kumanovë, ç’ka i linte mundësi kreut të shtetit të argumentonte me nevojën urgjente të përfaqësimit tonë me ambasador në Shkup. /tesheshi.com/
