Nga Donat Maloku
Kryeministri Isa Mustafa ka thënë se Asociacioni i Komunave me shumicë serbe nuk e ka asnjë element ekzekutiv dhe nuk ka arsyet të kundërshtohet themelimi i tij.
Mirëpo, njohësit e rrethanave politike në vend kanë mendim të kundërt me kreun e Qeverisë. Ata thonë se ky Asociacion do të ketë kompetenca ekzekutive në arsim, shëndetësi, zhvillim ekonomik etj dhe si i tillë nuk duhet të pranohet pasi lë jashtë kontrollit të Republikës së Kosovës dhe në duar të Serbisë rreth 30 përqind të territorit të vendit.
Kurse, ish deputet të Kuvendit të Kosovës thonë se dëmi është bërë, por duhet protestuar kundër Asociacionit, të shkarkohet Qeveria dhe të shkohet në zgjedhje të jashtëzakonshme.
Ish deputeti i Kuvendit të Kosovës, Driton Tali, thotë se këtë marrëveshje e sheh si prodhim të “Planit gjashtë pikësh”, duke thënë se më në fund Hashim Thaçi pas shumë e shumë peripetive, e realizoi “Planin gjashtë pikësh” të Ban Ki-Moonit, edhe pse nuk e ka pasur, pasi i është dashur shumë herë të gënjej dhe mashtrojë.
“Njëmend Thaçi (dhe Mustafa) duhet me ju falënderuar edhe disa gazetarëve të tij, sidomos atyre të RTK-së por edhe disa televizioneve tjera, dhe të gazetave e portaleve “tija”, por edhe besa shumë OJQ-istëve e “analistëve” se goxha i kanë ndihmuar në realizimin e këtij plani të iniciuar nga Beogradi. “Plani gjashtë pikësh” i përmbante këto fusha: policinë, drejtësinë, doganat, kufirin, telekomunikacionin dhe infrastrukturën si dhe trashëgiminë serbe. Siç e dini Edita Tahiri me ekipin e saj në Bruksel ka negociuar vetëm në këto fusha. Çfarë duhet bërë tashti? Si është ajo thënia ‘një i marrë e gjuan një guri në pus e njëqind të urtë s’mund ta nxjerrin’. Është nënshkruar, dëmi është bërë. Sigurisht se duhet protestuar, dhe duhet shkarkuar këtë Qeveri. Vendi duhet shkuar në zgjedhjet e jashtëzakonshme”, ka deklaruar Tali për portalin “Te Sheshi”.
Analisti politik, Islam Krasniqi, në një prononcim për portalin “Te Sheshi”, ka thënë se marrëveshja e fundit në Bruksel lidhur me Asociacioni ka krijuar një mjegulli të madhe, pasi njëra pale thotë se nuk do të ketë kompetenca ekzekutive, kurse pala tjetër thotë të kundërtën.
“Përderisa Mustafa nuk e publikon këtë marrëveshje, ajo dihet se Asociacioni ka kompetenca ekzekutive, me ç’rast në Kosovë po krijohet një Bosnje e dytë. Kjo marrëveshje është shumë e dëmshme për Kosovën, nuk benë të pranohet në asnjë mënyrë, por duhet të kundërshtorët me të gjitha mekanizmat, sepse kjo po shkelë mbi sovranitetin e shtetit tonë. Liderët tanë janë në gjendje të nënshkruajnë gjithçka vetëm e vetëm që të ju zgjatet mandati dhe të jenë të pëlqyer nga ndërkombëtarët. Duke u thirrur në patriotizmin falso, po e copëtojnë sovranitetin dhe po harrojnë se edhe Esat Pasha ka luftuar për çlirimin e Shqipërisë, edhe ai ka qenë atdhetar, por në tavolinë e ka humbur betejën dhe populli ja dha hakun”, thotë Krasniqi.
Njohësi rrethanve politike në vend, Faik Krasniqi thotë se pala kosovare edhe para fillimit të bisedimeve me Serbinë por edhe në vazhdim është treguar shumë e papërgjegjshme, pasi nuk i ka vënë asnjë kusht të vetëm Serbisë!
“Formimi i Asociacionit të Komunave Serbe apo Zajednica, lë jashtë kontrollit të Republikës së Kosovës dhe në duar të Serbisë, rreth 30 përqind të territorit të vendit! Kështuqë me krijimin e këtij asociacioni, po krijohet një mini-shtet brenda Kosovës, ku do të ketë kompetenca shtesë në gjyqësi e polici si dhe në arsim dhe shëndetësi! Prandaj si e tillë nuk duhet të pranohet, sepse do ketë pasoja, duke e bërë të pamundur funksionimin e Kosovës si shtet normal! Tekefundit me këtë gjë duhet të merret edhe Gjykata Kushtetuese, siç ishte rasti në Shqipëri për marrëveshjen e detit me Greqinë, kur Gjykata Kushtetuese e Shqipërisë, e hodhi poshtë atë marrëveshje që ishte në dëm të shtetit!”, ka deklaruar Krasniqi për “Te Sheshi”.
Analisti, Blerim Burjani, ka deklaruar për portalin “Te Sheshi”, se Asociacioni i Komunave me shumicë serbe do ta ketë emërtimin e vet, simbolet, do të ketë kompetenca ekzekutive në arsim, shëndetësi, çështje sociale, zhvillim ekonomik. “Tash priten ndryshimet kushtetuese, brenda kushtetutës së Kosovës, vendoset Asociacioni për të siguruar këtë pakicë në Kosovë dhe Forcat e Armatosura të Kosovës. Tash sipas këtij skenari mund të vjen demarkacioni me Serbinë dhe njohja e Serbisë nga Kosova, pra po shkohet ka fundi. Negociata për njohje të Kosovës nga Serbia mund të marrin edhe dy vjet. Kështu mund të thuhet se mund të përfundoj një skenar strategjik ndërkombëtar. Serbia e humbi luftën edhe gjasat për të nënshkruar Marrëveshjen në Rambuje, por iu garantua se do të ketë mbrojtje të pakicës serbe në Kosovë dhe pakicave tjera. Nuk është e vërtetë atë që deklaroj kryeministri Isa Mustafa se po flitet e nuk i kanë ditur parimet, këto gjëra janë kurdisur shumë më herët kur Mustafa ishte kryetar komune i Prishtinës”, ka deklaruar Burjani.
Ndryshe, të martën delegacioni i Kosovës dhe Serbisë në Bruksel arritën katër marrëveshje në pako, marrëveshjen për themelimin e Asociacionit të Komunave me shumicë serbe, për telekomin, energjinë dhe largimin e “Parkut të Paqes” në Mitrovicë. /tesheshi.com/
