Deputetja socialiste, Elisa Spiropali, ka reaguar sërisht sot në lidhje me situatën e krijuar dje në Kuvend, ku kryetari i opozitës, Lulzim Basha, nuk pranoi të lërë sallën e seancave, pas përjashtimit nga kryetari i Parlamentit, Gramoz Ruçi. Sipas Spiropalit, me këtë qëndrim PD tregoi se do të marrë peng Kuvendin.
“Basha nuk mund të marri peng foltoren, të thotë e dua tani dhe e dua komplet. Debati për Reformën Zgjedhore u kërkua në moment nga zoti Basha dhe nuk ishte parashikuar. Basha kujton se nëse merr peng foltoren do të bëhet lider, por lider nuk bëhesh ashtu.
Për reformën zgjedhore nuk kishte nevojë për debat pasi ne i kishim pranuar të gjitha kushtet. Jemi të vendosur që të kemi zgjedhje me një reformë zgjedhore të plotë”, ka thënë Spiropali.
Sipas nënkryetares së grupit socialist, nga veprime të tilla PD nuk ka parë hajër dhe këtë e tregojnë edhe rezultatet zgjedhore. /tesheshi.com/
