Nga Bashkim Kastrati
Në Kosovë me sukses ka përfunduar fushata e korrje-shirjeve, por as këtë vit nuk është siguruar mielli për popullatën. Në lidhje me këtë çështje, por edhe me cilësinë e grurit ka deklarata të ndryshme nga Ministria e Bujqësisë dhe Federata e Bujqve të Kosovës. Ministria thotë se Kosova nga rendimentet vendore ka siguruar rreth 70 për qind të miellit, ndërsa Federata e Bujqve thotë se nuk është siguruar as gjysma e nevojave për miell dhe se pjesa tjetër duhet të importohet.
Sipas Kësaj federate, as cilësia nuk ka qenë e mirë dhe kjo si pasojë se farat janë të dobëta, edhe ato që prodhohen në vend nuk janë kualitative. Ata thonë se më shumë përdoren fara që vijnë nga Serbia dhe fatkeqësisht çdo herë po vjen farë e falsifikuar nga atje.
Ndërkaq, Ministria e Bujqësisë thotë se rezultatet e tyre kanë dalë nga monitorimi i tërë procesit të korrje-shirjeve, kurse të dhënat e tjera i kanë marrë nga drejtoritë komunale për bujqësi.
Zyra për komunikim e Ministrisë së Bujqësisë, Pylltarisë dhe Zhvillimit Rural (MBPZHR), ka thënë për tesheshi.com se gjatë këtij viti në gjithë territorin e Kosovës me kulturën e grurit kanë qenë të mbjella rreth 85 mijë hektarë, ndërkaq rendimentet konsiderohen të kënaqshme, po ashtu edhe cilësore.
“Rendimenti mesatar i grurit për këtë vit ka arritur deri në 3,500 kilogramë për hektar. Rreth 300 mijë tonë janë siguruar nga rendimentet e grurit, e nga kjo sasi e grurit sivjet Kosova i mbulon 70 për qind të nevojave me grurë vendor, ndërsa pjesa tjetër, do të sigurohet nga importi. Nëse flasim për ta plotësuar nevojën qind për qind , atëherë Kosova ka nevojë edhe për 100 mijë tonë të tjera, apo 25 mijë hektarë”, thuhet në përgjigjen e MBPZHR.
Federata e Bujqve: Kosova ka siguruar vetëm 27% të nevojave me miell
Federata e Bujqve të Kosovës na jep tjera të dhëna sa i përket rendimenteve për hektar, cilësisë, por edhe plotësimit të nevojave me miell të popullatës. Të dhëna këto që ndryshojnë shumë nga ato të MBPZHR-së.
Tahir Tahiri, kryetar i Federatës së Bujqve të Kosovës, ka thënë për tesheshi.com se as këtë vit Kosova nuk i plotëson as për së afërmi kërkesat për furnizim me miell. Ai nuk është i kënaqur as me rendimentet në këtë vit.
“Që prej pas lufte, në këtë verë kemi korrur rendimente më të ulëta të grurit, rreth 2700 kg për hektar. Ne (Federata Sindikale e Bujqve të Kosovës-FSBK) kemi ardhë në konkludim se sivjet Kosova ka siguruar bukën vetëm 27% të nevojave për popullatën e saj. Për t’i përmbushur të gjitha nevojat për bukë, Kosovës i duhet që t’i importojë edhe 350 mijë ton grurë”, ka thënë Tahiri.
Tahiri thotë se fajtor kryesor për mospërmbushjen e nevojave të popullatës me miell është Ministria e Bujqësisë, Pylltarisë dhe Zhvillimit Rural, që sipas tij nuk po bën sa duhet në këtë drejtim. Ai thotë se duhet marrë një serë masash që të rriten sipërfaqet e tokës të mbjella me grurë.
“Për t’i plotësuar nevojat e duhura me grurë për Kosovën, duhet të eliminohet korrupsioni në MBPZHR dhe të rritet buxheti në 200 milionë euro për bujqësi, të investohet rikthimin e popullatës në tokat e lëna djerrinë qysh prej paslufte, të investohet në mekanizëm bujqësor, të merren masa për eliminimin e konkurrencës jolojale nga importi, të ndalohet sjellja e plehrave, farërave, pesticideve, naftës false nga importi, të formohet një agro-banke për kredi bujqësore me kamata rreth 3% me afate të gjata kthimi”, ka thënë Tahiri.
Tutje ai thotë se qeveria duhet të subvencionojë në çmimin grumbullues të grurit për t’i stimuluar prodhuesit e grurit.
“Duhet të eliminohet korrupsioni në Doganat e Kosovës, të ndalohet futja ilegale e grurit që vjen nga Serbia me vlera shumë të dobëta dhe të dëmshme për shëndetin e njeriut”, u shpreh Tahiri.
Importi i grurit i dyshimtë
Mossigurimi i miellit për nevojat e popullatës në Kosovë nga rendimentet vendore, krijon domosdo nevojën për import.
E importimi më masiv bëhet nga Serbia dhe dyshohet se është e cilësisë së dobët.
Para disa muajve është raportuar se në Kosovë ka hyrë sasi e madhe e grurit të cilësisë së dobët, e cila ka qenë e dedikuar për kafshë. E këtë produkt e kanë ngrenë qytetarët e Kosovës.
Edhe Komisioni për Bujqësi i Kuvendit të Kosovës ka konfirmuar për importimin e grurit të dedikuar për kafshë dhe se sasia e këtij gruri që ka hyrë në Kosovë ka qenë 10 mijë ton.
Sipas të dhënave të Doganës së Kosovës, vitin e kaluar në Kosovë janë importuar mbi 53 milionë kilogramë grurë dhe mbi 44 milionë kilogramë miell, kurse në gjashtëmujorin e parë të këtij viti, janë importuar mbi 20 milionë kilogram grurë, ndërkaq miell mbi 23 milionë kilogramë. /tesheshi.com/
