Kutitë e votimit janë hapur sot në tërë Spanjën, ndërsa votuesit do të përcaktojnë se cila parti apo se cili koalicion ka për t’i udhëhequr në vitet e ardhshme.
Me rripin e qytetarëve të shtrënguar dhe me papunësinë në shifrën 21 për qind, këto janë zgjedhjet më të paparashikueshme në Spanjë. Nga ç’tregojnë anketimet, votimi i sotëm mund t’i japë fund sundimit të dy partive kryesore të vendit, Partisë Popullore në pushtet dhe socialistëve të PSOE-së, duke e bërë të qenësishme dhe vendimtare pozitën e dy partive të reja, Podemos-it dhe Ciudadanos-it.
Partia Popullore kryeson megjithatë në parashikimet, e shihet si fituesja e këtyre zgjedhjeve, ndonëse nuk mendohet që do të jetë në gjendje të sigurojë një shumicë parlamentare.
Kryeministri i vendit, konservatori Mariano Rajoy, ka paralajmëruar se do të bëjë ç’është e mundur për të penguar marrjen e pushtetit nga një koalicion i së majtës, e për këtë do të kërkojë aleancë dhe me politikanët jashtë gjirit të partisë së tij.
Konservatorët erdhën në pushtet në 2011-ën, shtatë vite pasi qëndruan në opozitë ndërsa qeveriste PSOE-ja. Historia e vonë politike spanjolle është dominuar nga ndërrimi i pushtetit mes këtyre dy partive. /tesheshi.com/
