Për të 7-herë në historinë e saj Spanja shpallet kampione e Europës në kategorinë e 19-vjecarëve. Në finale La Roja mundi me rezultatin e pastër 2-0 Rusinë duke fituar me meritë të plotë një turne që e dominoi nga fillimi në fund. Talentet e reja të futbollit spanjoll të udhëhequr nga trajneri Luis De La Fuente lanë shenjën e tyre në Europianin e kësaj grup moshe që u zhvillua në Greqi dhe në fund u shpërblyen me titullin e skuadrës kampione. Spanja e 19-vjecarëve tashmë ka shkruar historinë pasi fitoi për herë të 7-t nga 14 herë që është zhvilluar gjithsej kampionatin Europian. Në stadiumin Katerinis në qytetin e Katerinit finalja mes La Rojas dhe Rusisë nisi me Spanjën më kërkuese. Të frymëzuar edhe nga loja e yllit të tyre futbollistit më të ri të Realit të Madridit Marco Asensio spanjollët nuk i lanë asnjë shans Rusisë dhe në minutën e 38-të arritën të zhbllokonin rezultatin.
Asensio me një goditje në kujiftë e perfeksionit u duk sikur realizoi por portieri rus Mitryushkin bëri një pritje të mrekullueshme duke zgjatur dorën për ta dërguar topin në traversë, megjithatë aty përfitoi sulmuesi Borja Majoral që me një goditje të saktë me kokë kaloi Spanjën në epërsi. Në pjesën e dytë skuadrës së Luis De La Fuentes iu anullua një gol për pozicion jashtë loje të Vallejos pas një rasti flagrant të Pedrazas, gjithsesi Spanja hipotekoi suksesin e saj të 7-të në Europianin e 19-vjecarëve me golin e 2-0 në minutën 78-të. Nahuel Leiva përfitoi nga një asist perfekt i Marco Asensios duke mposhtur për herë të dytë në këtë takim portierin e kombëtares ruse Mitryushkin. Në stadiumin Katerinis deri në fund nuk ndryshoi më asgjë në rezultat dhe gjithcka u mbyll me suksesin 2-0 të Spanjës. /tesheshi.com/
