Dy vjet pas ngritjes së aktakuzës për hedhje të gazit në Kuvendin e Kosovës, katër deputetët e Lëvizjes Vetëvendosje sot do të mësojnë epilogun e gjykimit të tyre. Gjykata Themelore e Prishtinës në orën 13:00 do të shpallë aktgjykimin ndaj Albin Kurtit, Albulena Haxhiut, Faton Topallit dhe Donika Kadaj-Bujupit.
Të katër vetëvendosësit akuzohen për hedhje të gazit në seancën e Kuvendit të Kosovës me qëllim të pengimit të ratifikimit të Marrëveshjes së Demarkacionit me Malin e Zi dhe Marrëveshjen për Bashkësinë e komunave me shumicë serbe.
Deputetja, Albulena Haxhiu përmes një shkrimi në “Facebook”, ka bërë të ditur se nuk do të jenë në seancë për të dëgjuar aktgjykimin të cilin e ka cilësuar si politik.
Sipas saj, asnjë prej pretendimeve që i ka ngritur prokurori, nuk janë të mbështetura me prova e fakte dhe se gazi lotsjellës nuk është armë.
Haxhiu ka shtuar se (gazi lotsjellës) ishte mjeti i vetëm e i domosdoshëm për ta shpëtuar Kosovën, për siç ka shkruar, nga copëtimi dhe bosnjëzimi. /tesheshi.com/
