Një tjetër sonazh është publikuar këtë të martë vetëm 5 ditë para zgjedhjeve vendore. Bëhet fjalë për sondazhin e kompanisë IPR Marketing për llogari të televizionit Ora News, sondazh që si pikë kulmorë ka garën “rrotë më rrotë” në Durrës ku Grida Duma dhe Vangjush Dako luftojnë në fotofinish për çdo votë.
Sondazhi u krye në datat 10-15 qershor 2015, marzhi i gabimit është ±3.2% në nivel lokal dhe ±2.5% në nivel kombëtar. Të anketuarit kanë qenë 1001 persona në bashkinë e re të Shkodrës, 1000 në Durrës dhe 1003 në Tiranë. Të dhënat e popullatës janë marrë nga Censusi i vitit 2011 dhe të dhënat e INSTAT të vitit 2014.
Tirana
Në Tiranë, Erion Veliaj rritet nga sondazhi në sondazh edhe pse me pak pikë duke çimentuar fitoren e tij në bashkinë më të madhe në vend. Ai në këtë sondazh merr 51% të votave kundër 33.5% të kandidatit të djathtë, Halim Kosova. Erion Veliaj është rritur me 1 pikë nga hera e kaluar, ndërsa Halim Kosova ka mbetur po në vend. Të njëjtën përqindje ka ruajtur edhe kandidati i pavarur në Tiranë, Gjergj Bojaxhi i cili po bëhet tashmë një realitet në skenën politike shqiptare. Ai ka mbetur në kuotën e 11%, aq sa ishte dhe në sondazhin pararendës. Ndërkohë vijon Sazan Guri me 3.5%, Arben Tafaj dhe Dhimitër Muslia me nga 0.5%
Koalicioni i majtë në Tiranë vazhdon dhe thellon kryesimin me 64% të votave kundrejt 34% të koalicionit të djathtë. E majta ka shënuar rritje të lehtë nga sondazhet e para, respektivisht 1 pikë nga sondazhi i 3 qershorit dhe 4 pikë nga ai i 13 majit. Ndërsa e djathta ka mbetur në po ato kuota. APPD merr 34% të votave, aq sa sondazhin e kaluar të 3 qershorit. Partia Socialiste në Tiranë ka 48% të votave, PD merr 30% të votave dhe LSI merr 11% të votave.
Durrësi
Garë deri në kthesën e fundit premton Durrësi. Tashmë fushata atje ka arritur në kulm dhe që sondazhi nuk mund ta parashikojë fituesin, kjo është pak por e sigurtë. Vangjush Dako me Grida Dumën do të ndahen me votën e fundit. Në këtë sondazh kandidati i majtë merr 51% të votave kundrejt 49% të kandidates së djathtë. Për tu theksuar është se në sondazhin e parë të 13 majit rezultati ishte po ky që është edhe sot. Pas thellimit të diferencës në sondazhin e dytë ku zoti Dako merrte 54% të votave dhe Grida DUma 46%, në sondazhin e sotëm, loja ka nisur nga fillimi. Durrësi përveç surprizës së fituesit, është adrenalinë për të apasionuarit e zgjedhjeve.
Përsa i përket koalicioneve, e majta ka shënuar rënie krahasuar me sondazhet e para. Ajo merr 54% të votave kur në sondazhin e parë merrte 57% dhe në të dytin 58.5% ndërsa e djathta është rritur me 4.5 pikë nga hera e fundit. APPD merr 45% të votave pas 41.5% të sondazhit të 13 majit dhe 40.5 të sondazhit të 3 qershorit. Partia Socialiste është partia e parë në Durrës me 39% të votave, PD e dyta po me 39% të votave dhe LSI me 10% të votave.
Shkodra
Pas mungesës në sondazhin e dytë, rikthehet Shkodra, në fakt jo me lajme të reja. Kjo pasi Voltana Ademi vazhdon kryesimin me një diferencë të thellë përballë Keti Bazhdarit. Kandidatja e djtathtë merr 57% të votave kundrejt 41% të votave që merr zonja Bazhdari e ASHE. Ndërkohë kandidati i pavarur i regjistruar rishtaz, zoti Vullnet Elbasani merr 2% të votave në Bashkinë Shkodër. Kandidatja e APPD duket se e ka çimentuar fitoren në Shkodër ku vetëm një mrekulli mund ta përmbysë këtë rezultat. Votat e koalicioneve kanë pësuar një ngushtim të diferencës me sondazhin e parë të 13 majit. Koalicioni i majtë merr 44.5% të votave duke u rritur me 1% nga sondazhi i parë ndërsa koalicioni i djathtë merr 53.5% të votave duke shënuar një ulje prej 1.5% nga hera e kaluar ku kishte siguruar 55% të votave. Partia Demokratike është partia e parë në Shkodër me 49%, e ndjekur nga PS me 32% dhe LSI me 10%.
Vota në rang Kombëtar
E majta duket se do të thellojë rezultatin e arritur në zgjedhjet e vitit 2013 përsa i përket votës politike, mbase edhe nga shtimi i numrit të partive në koalicion. Aleanca për Shqipërinë Europiane merr 62% të votës në rang kombëtar krahasuar me 59,3% që ka marrë në vitin 2013. Partitë më të mëdha të saj janë PArtia Socialiste me 44.5% të votave e ndjekur nga LSI me 12.5% të votave. Më pas vjen FRD me 2% dhe partitë e tjera bëjnë gjithsej 3%.
E djathta ka rënie nga zgjedhjet e vitit 2013, edhe pse këto zgjedhje konsiderohen më të vështirat për ta. Aleanca Popullore për Punë dhe Dinjitet merr sot 36% të votave ndërsa në 2013 ajo merrte 39.5% të votave. Partia Demokratike është partia më e madhe e këtij koalicioni me 31% të votave e ndjekur nga PR me 2% të votave.
