Sipas një sondazhi të kompanisë së njohur Gallup International, 39% e shqiptarëve mendojnë se 2017-a do të jetë një vit i prosperitetit ekonomik. Ndërkohë 29% janë pesimistë rreth perspektivës ekonomike të vitit.
I lartë është dhe numri i atyre që janë neutrale, pra që mendojnë se vendi nuk do të jetë as më mirë dhe as më keq, me 30%.
Por rezultatet tregojnë se Shqipëria është pak më ulët se mesatarja globale, ku 42% e popullsisë në Botë mendon se perspektiva ekonomike e 2017-s do të jetë positive. Optimizmin më të lartë e shfaqin qytetarët në shtetet europiane që përfshihen në sondazh.
Në krahasim me rajonin, shqiptarët janë shumë më tepër optimistë lidhur me perspektivën ekonomike. Në Bosnjë, pesha e optimistëve është vetëm 18%, ndërsa pesimizmi mbizotëron me 38%.
Në Bullgari, përqindja e atyre që mendojnë se perspektiva ekonomike e vendit për 2017-n do jetë pozitive është 12%, shkruan Monitor.
E krahasueshme me Shqipërinë është vetëm Kosova, me 37%, ndërsa Maqedonia e ka nivelin e optimizmit ekonomik në 33% dhe Serbia 23%.
Interesant është që vendet e zhvilluara të Europës Perëndimore, me një standard të lartë jetese dhe të ardhura shumë më të larta për frymë, duket se nuk kanë pritshmëri të mëdha. Ata nuk shprehen kaq optimistë sa rajoni lidhur me perspektivën e tyre ekonomike.
Në Itali, ky tregues është 9%, përkundrejt 57% që janë pesimistë, në Gjermani 13%, në Greqi 6%, në Suedi 10%, në Mbretërinë e Bashkuar 15%.
Ironike është që vendet më optimiste në botë janë shtete relativisht ato të pazhvilluara, si Bangladeshi (81%), Gana (73%), India (69%), Nigeria (58%), Pakistani (56%)./tesheshi.com/
