Nga Blendi Gashi
Ndonëse ende nuk dihet se kur do të mbahen zgjedhjet paralamentare në Kosovë, e që flitet se mund të trokasin vitin e ardhshëm, sondazhe të ndryshme po masin opinionin pothuajse çdo muaj.
Më të fundit të realizuara nga Instituti Demokratik i Kosovës (KDI) tregojnë se disponimi është që të ndodhin ndryshime rrënjësore në qeverisje.
Sondazhi në fjalë tregon se votuesit e rinj nga mosha 17 deri 21 vjeç, e duan Lëvizjen Vetëvendosje në pushtet pasi e renditin të parën me 27%, duke lënë PDK-në në vend të dytë me 20 %, ndërsa LDK-ja për herë të parë rrëshqet si forca e tretë politike me vetëm 14%.
Ndërsa drejtuesit të VV-së e kanë mirëpritur këtë sondazh duke thënë se “rritja e madhe e Lëvizjes është bërë fakt i pamohueshëm”, PDK deri më tani nuk ka komentuar, ndërsa LDK nuk e merr seriozisht.
Kreu i kësaj të fundit, Isa Mustafa, duke ironizuar me drejtuesit e KDI-së ka thënë se s’ka si t’i besojë këtij sondazhi, pasi sipas tij organizatat e shoqërisë civile janë të politizuara.
“Mendoj që shoqëria civile ka të drejt ta bëjë punën e vet, por në Kosovë problemi është se nuk kemi shoqëri civile të depolitizuar – kemi një shoqëri civile e cila vetëm duhet me prit pak kohë edhe me pa se në cilën parti po hyn. A po shkojnë në Vetëvendosje-s, a po shkojnë në PDK, a në LDK. Sondazhi për mua janë zgjedhjet, aty e shohim cili është rezultati konkret. Unë dyshoj që qytetarët e Kosovës e përkrahin dhunën, kalljen e molotovin”, ka thënë Mustafa.
Pavarësisht këtij deklarimi, kreu i LDK-së duhet të ketë të qartë se deri më tani asnjë nga sondazhet e bëra nuk e ka nxjerrë si të parën partinë e tij, dhe pavarësisht se atij mund të mos i pëlqejnë sondazhet, ato tregojnë se ka një pakënaqësi në rritje ndaj partisë në krye të së cilës është.
Analistët thonë se sondazhi në fjalë tregon më së miri se rinia dëshiron ndryshim pasi është e ngopur me partitë në pushtet që i ka lënë në harresë, përkundër se cilësohen e ardhmja e vendit.
Analisti politik Shefqet Dibrani, thotë ndryshimi i kësaj “status quoje” do të ishte fat për Kosovën, por mbetet për të shpresuar se opozita është e aftë për të manovruar një proces parazgjedhor i cili asaj do t’i garantonte fitore të sigurt.
“Është detyrë e opozitës që të përpunoj programin politik duke i evituar të gjitha vrazhdësitë në udhëheqje dhe të relativizojë raportin me Bashkësinë Ndërkombëtare, veçmas me Amerikanët të cilëve duhet t’iu japin argumente bindëse për një frymë tjetër, më liberale dhe me të gjitha indikacionet për të ndryshuar. Sepse kundër veprimeve radikale dhe të dhunës janë të përcaktuara konceptet evropiane të qeverisjes. Çdo formë tjetër e mbetjes në pushtet për të qeverisur PDK-ja ose LDK-ja është përcaktim i gabuar, pasi e keqja do të riciklohet përmes një stafi tjetër dhe me disa ndryshime kozmetike, të cilat fare nuk qojnë peshë”, thotë Dirabi, për tesheshi.com.
Analisti tjetër, Nexhmedin Spahiu, sondazhin e KDI-së ku e nxjerr fitues VV-në e sheh një si një lloj sinjali që epokës 8-vjeçare qeverisëse të PDK-së po i vije fundi.
“Është mëse normale që rinia anon më shumë nga VV. Ata nuk e kanë përjetuar luftën dhe nuk janë mirënjohës amerikanëve dhe aleatëve prëndimor si brezat që kanë përjetuar luftën. Edhe nëse shohin që amerikanët po përkrahin PDK e LDK, ky brez nuk e ka problem me u i dalë kundër edhe amerikanëve, gjë që këtë kurr nuk do të mund ta bënte brezi im apo brezi i babit tim. Brezi i ri nuk e ka parë se ku e ka shpjerë Shqipërinë ideologjia e Enver Hoxhës prandaj lehtë mund të joshet nga kjo ideologji”, thotë Spahiu, për tesheshi.com.
Kurse Faik Krasniqi, njohës i rrethanave politike, thotë se keqqeverisja, kapja dhe degradimi i shtetit nga ana e PDK-së, për këto tre mandate sa është në pushtet, ka bërë që kjo parti të humbas besimin e qytetarëve, e sidomos besimin tek të rinjtë e Kosovës, që përbëjnë mbi 70 % të popullatës së përgjithshme në Kosovë.
“Të rinjtë e Kosovës janë ngopur më me mashtrimet dhe përrallat e këtyre dy partive. Padyshim se është një sinjal pozitiv që në zgjedhjet e ardhshme do të ketë ndryshime rrënjësore dhe PDK-ja, parti mafioze dhe kriminale, do të bie nga pushteti. E njëjta gjë vlen edhe për partnerin e saj në LDK-në, që për interesat e Isa Mustafës dhe të sahanlëpirësve brenda kësaj partie, u bën bashkë me klanin ‘Pronto’ në kapjen e shtetit”, thotë Krasniqi, për tesheshi.com.
Ndryshe një numër i madh i të anketuarve prej 18% kanë refuzuar të përgjigjen në pyetjen se për cilën parti politike do të votonin në zgjedhjet e ardhshme. /tesheshi.com/
