Kongresi i Partisë Socialiste Bullgare ka nxjerrë një udhëheqës të ri pas votimeve të djeshme. Për herë të parë në historinë e kësaj partie, atë do ta drejtojë një grua.
Në raundin e dytë të zgjedhjeve, Kornelia Ninova ka siguruar mbështetjen e 395 delegatëve, kundrejt 349 votave që mblodhi kryetari aktual i partisë, Mihail Mikov.
Një juriste, e njëkohësisht deputete në tre legjislatura, 47-vjeçarja Ninova ia doli të fitojë një garë jashtëzakonisht të fortë për zgjedhjen e kryetarit të ri të socialistëve bullgarë.
Në kongresin e Partisë Socialiste Bullgar,e të zhvilluar në dy ditët e shkuara, pati fillimisht 28 kandidatura për postin e kryetarit. Të shtunën mbetën pesë të tillë nga i tërë ky numër.
Mihail Mikov, i cili e pati marrë kryesimin e partisë dy vite më parë, doli fitues në raundin e parë, duke mbledhur 329 vota kundrejt 280 votave të Ninovës.
Vërtet kjo nuk ishte hera e parë që zgjedhja e kryetarit do të bëhej në raundin e dytë, por surprizë qe përmbysja e situatës.
Në votimet e së dielës, Ninova e pa veten fituese, duke u vënë në krye të socialistëve.
“Të dashur shokë,” tha ajo pas zgjedhjes, “faleminderit për besimin që më dhatë. Nuk do t’ju zhgënjej, nuk do t’ju tradhtoj. Nesër do ta ndryshojmë së bashku Partinë Socialiste Bullgare.”
Kryetarja e re e socialistëve kishte deklaruar që dy ditë më parë se udhëheqësi i ri do të duhej të bashkonte partinë dhe të kërkonte zgjedhje të parakohshme, për t’i dhënë fund qeverisjes së Boiko Borisovit, kryeministrit aktual.
Socialistët do të mblidhnin vetëm 18.3 për qind të votave në zgjedhjet e përgjithshme të vitit 2014, duke u renditur si parti e dytë.
Bullgaria do të ketë zgjedhjet presidenciale në fund të tetorit apo në fillim të nëntorit të këtij viti. /tesheshi.com/
