Sllovenët kanë nisur sot vendosjen e telave me gjemba përgjatë kufirit me Kroacinë. Synimi, sipas autoriteteve të vendit, nuk është pengimi i refugjatëve që të hyjnë në Slloveni, por drejtimi i tyre.
Këtë e ka bërë të qartë sekretari i Shtetit në Ministrinë e Brendshme, Bostjan Sefiç, i cili ka thënë në një konferencë shtypi se Sllovenia nuk planifikon të reduktojë ndjeshëm rrëkenë e emigrantëve.
“Pengesat nuk kanë qëllimin të pengojnë të ardhurit në Slloveni. Qëllimi është drejtimi i valës së emigrantëve, për të kontrolluar pikat hyrëse.”
Puna për ngritjen e pengesave me tela me gjemba nisi sot në fshatin kufitar të Veliki Obrezit, në juglindje të Sllovenisë.
Që prej tetorit, kur Sllovenia u bë pikëkalimi i ri i refugjatëve, në të kanë hyrë rreth 180.000 të tillë, për t’u drejtuar më pas më së shumti drejt Austrisë dhe Gjermanisë.
Kryeministri slloven u ankua dje për kapacitetet e pakta të vendit të tij për të përballuar një numër të madh refugjatësh, por duke shtuar se kufiri me Kroacinë do të vijojë të mbetet i hapur. Pengesat, sqaroi ai, thjesht nuk do t’i lënë refugjatët të futen në vend jashtë pikave të kalimit kufitar. /tesheshi.com/
