Sllovakët kanë lënë pas humbjen me Uellsin për të marrë sot tre pikët e para në një kampionat europian. Një Sllovaki krej ndryshe nga ajo e takimit debutues, që në pjesën më të madhe të lojës qe shumë më mirë se Rusia. Fitorja e sotme 2-1 i rifut në lojë sllovakët për të kaluar grupin.
Dy golat e tyre do të shënoheshin në pjesën e parë, e që të dy do të ishin mjaft të bukur, veçanërisht i dytë.
Weiss i kalon sllovakët në avantazh në minutën e 32-të me një goditje brilante. Por shumë më i bukur do të ishte goli i dytë, i shënuar nga Hamsik në minutën e 45-të. Një ekzekutim i përsosur i lojtarit të Napolit, që tregoi klasin e tij në këtë takim.
Rusët nuk do të dorëzoheshin, duke shpresuar ta barazonin rezultatin. Glushakov do t’i ngushtonte shifrat dhjetë minuta para mbarimit të lojës. Përpjekjet e mëtejshme nuk dhanë rezultat.
Anglia me Uellsin do të ndeshen nesër në të njëjtën orë, ndërsa grupi është komplikuar mjaft, me të katër skuadrat që kanë mundësi të kualifikohen për në fazën pasuese të turneut.
Uellsi dhe Sllovakia kanë nga 3 pikë për momentin, kurse Anglia e Rusia janë në kuotën e 1 pike. Sidoqoftë, duhet pritur dhe ndeshja e nesërme për një panoramë më të qartë të grupit B. /tesheshi.com/
