Kryeministrja e Skocisë, Nicola Sturgeon, ka bërë të ditur se javën e ardhshme do të publikohet një projektligj mbi referendumin për pavarësinë, që do të ishte i dyti pas atij të vitit 2014.
Sturgeon tha në një konferencë në Glasgou të SNP-së, Partisë Kombëtare Skoceze, se Skocia ka të drejtën të zgjedhë një udhë të ndryshme nëse nuk i lejohej t’i mbronte interesat e saj brenda Mbretërisë së Bashkuar.
Skocia, sipas saj, ka të drejtë të kërkojë diçka më të mirë nëse ekzistojnë gjasat për një të ardhme të paqëndrueshme si pjesë e Britanisë.
“Jam e bindur se Skocia ka për ta patur aftësinë për ta rishqyrtuar çështjen e pavarësisë, e për të bërë kështu përpara se Mbretëria e Bashkuar ta lërë BE-në, nëse kjo është e nevojshme për t’i mbrojtur interesat e vendit tonë.”
Çështja e shkëputjes së Skocisë është hapur rishtas pas referendumit të qershorit në Britani për dalje nga BE-ja. Vetë skocezët votuan për qëndrimin në BE, por votimi i përgjithshëm qe për dalje.
Ndërkaq, në referendumin e parë për pavarësinë e Skocisë, të zhvilluar më 18 shtator të dy viteve më parë, 55 për qind e votuesve u shprehën me votë kundër daljes më vete. /tesheshi.com/
