Ekspertët e maceve të egra në Skoci janë duke bashkëpunuar me ekspertët iranianë për të zbuluar sekretin e një prej felinëve më të rrallë në botë: të maces së Pallas. Bëhet fjalë për një lloj mace që jeton në Iran, Mongoli dhe Kinë si dhe njihet me emrin ‘macja e stepave’. Ngjyra e tij e qimes në lëkurë ndryshon në varësi të stinës dhe konsiderohet si një specie me rrezik zhdukjeje, sipas Unionit Ndërkombëtar për Ruajtjen e Natyrës. Edhe fotografimi i kësaj maceje është shumë i vështirë. Kërkuesit kanë përdorur disa ‘kurthe’ për fotografimin e kësaj specieje, por deri më tani nuk është se ia kanë dalë me sukses.
Për të studiuar maçokun, David Barclay i “Royal Zoological Society of Scotland”, është vënë në kontakt me disa studiues iranianë dhe po bashkëpunojnë prej vitit 2013, kohë kur kanë nisur krijimin dhe zhvillimin e një projekti që konsiston në monitorimin e kafshës përmes një litari në formë jake.
“Ideja jonë është që të arrijmë t’i vëmë në qafë një këlyshi të racës Pallas një radio në formë qafore, në mënyrë që të mund të kontrollojmë lëvizjet e felinit. Më pas ai do të lihet i lirë në natyrë, në mënyrë që të merren informacione në lidhje me jetën dhe zakonet e kësaj race të mistershme. Nëse arrijmë ta realizojmë këtë, mund të arrijmë të zbulojmë se si sillen këto lloj kafshësh në habitatin e tyre”,- thotë David Barclay.
“Royal Zoological Society of Scotland” është duke mbështetur dhe financuar edhe një projekt të dytë kërkimor për macen Pallas në malet qendrore në Alborz të Iranit. “Është e qartë që interesi në lidhje m këtë specie sa vjen dhe rritet, jo vetëm në vendet ku kjo kafshë zhvillon jetesën, por në të gjithë botën”,- bëjnë me dije kërkuesit./tesheshi.com/
