Skënderbeu i Korçës do të luajë në grupin B në kompeticionin e Europa League, ndërsa takimi i parë është në transfertë kundër Dynamo Kiev, ndeshje që do të luhet më 14 shtator.
Ndeshja e dytë për “ujqërit e dëborës” do të luhet në “Elbasan Arena”, më 28 shtator, ora 21:05, ndaj Young Boys të Zvicrës.
Tre javë më pas, korçarët do të përballen me Partizanin e Beogradit, ndërsa e kthimit në Serbi do të luhet më 2 nëntor.
Ballafaqimi i fundit në grup për Skënderbeun do të jetë më 7 dhjetor, në Zvicër, në fushën e Young Boys.
Por, takimi me Partizanin e Beogradit duket se ka nisur nga tifozeritë e dy klubeve. Në faqen e Skënderbeut në rrjetin social janë postuar nga tifozët serbë disa provokime, të cilat kanë marrë kundërpërgjigjen e atyre të klubit korçar.
Dhjetra tifozë të Skënderbeut kanë postuar foto me flamurin shqiptar, video të hartës etnike të trojeve shqiptare apo edhe pamje nga droni që u ngrit në stadiumin e Beogradit disa vite më parë në takimin Serbi-Shqipëri.
Duket se tifozët e dy ekipeve janë nxehur ndjeshëm, çka është një sinjal për autoritetet në marrjen e masave ekstreme për të mbarëvajtur dy takimet, në Elbasan dhe Beograd. /tesheshi.com/
