Skandali me fëmijët me diabet në Shqipëri: shteti nuk iu rimburson insulinën

Nga Alba Skëndaj

Pacientët që vuajnë nga diabeti, mes të cilëve ka shumë fëmijë dhe të rinj nuk po mund të sigurojnë ilaçin kryesor të kësaj sëmundje: insulinën.

Shoqata e Fëmijëve dhe të Rinjve me Diabet denoncon për këtë skandal direkt strukturat shtetërore që nuk po mundësojnë furnizimin e farmacive më këtë ilaç, dhe më tej rimbursimin e kësaj kure për të sëmurët.

Në këtë situate, kjo shoqatë iu bën thirrje të gjithëve të reagojnë për këtë skandal, duke renditur edhe barrierat që ka nxjerrë shteti për këtë kategroi pacientësh:

1. Mosfurnizimin e farmacive me medikamentin insulinë, të vetmen që rimburson për personat me diabet tip 1 duke nxjerr si shkak skandalin e insulinave dhe abuzimet marramendëse që ishin bërë me to dhe duke lënë në mëshirë të fatit pacientët me diabet të cilët nuk dine se ku të drejtohen!
2. Përgatitjen e dokumenteve për daljen në kemp! Nëse analizat janë bërë në sektorin privat, nuk merren parasysh për të vazhduar procedurën e marrjes së ilaçeve, për faktin se analizat mund të bëhen dhe në shtet.
3. Shteti nuk merr parasysh që nuk ka reagent ndonjëherë dhe personat me diabet duhet të mundohen sa më shumë për ti bërë këto dokumente dhe për të marrë atë që me ligj iu takon!

Sipas të dhënave nga strukturat e shëndetit publik, rezulton se përhapja e diabetit në Shqipëri në popullatën e rritur është 1.9 përqind, që do të thotë se kemi afërsisht 60 mijë diabetikë të njohur. Në fakt numri duhet të jetë 2-3 herë më i lartë, pasi në disa kontrolle të kryera në kryeqytet është vënë re se tendenca e përhapjes së diabetit të padiagnostikuar ka qenë 3-4 përqind, që do të thotë se në realitet shifra e përafërt e diabetikëve duhet të jetë 120-150 mijë.

Mosha më prekur nga diabeti është grupmosha 40-65 vjeç që përbën gati 40 përqind të rasteve, por diabeti tip 2 po haset gjithnjë e më shpesh edhe në moshat 30-40 vjeç. Pikërisht këtu qëndron edhe rreziku i diabetit që po prek moshat që janë aktive për punë, por këmbanat po bien edhe tek fëmijët.

Mjekët thonë se fëmijët e prekur nga diabeti gjatë këtyre viteve të fundit kanë pasur një rritje të ndjeshme për shkak të një sërë faktorëve të cilët vijnë nga ata gjenetikë deri tek mjedisorë, ushqimit apo edhe mungesës së aktivitetit fizik.

Mjekët endokrinologë shpjegojnë se gjatë këtyre 10 viteve të fundit numri i fëmijëve të prekur nga diabeti tip 1 është 225 % më i lartë, ndërsa kërkojnë nga prindërit të jenë më të vëmendshëm ndaj “sinjaleve” të para të sëmundjes. /tesheshi.com/