Konferenca e djeshme e shtypit e kancelares gjermane dhe e presidentit egjiptian përfundoi në kaos ndërsa një 22-vjeçare, gazetare dhe studente e mjekësisë, e quajti “vrasës” Sisin. Studentja, e penguar që t’i bëjë një pyetje Sisit, ngriti zërin dhe tha, “Ai është një vrasës!”
Menjëherë më pas ca gazetarë egjiptianë nga delegacioni i Sisit u përgjigjën me slogane në mbështetje të tij, “Rroftë Sisi,” “Rroftë Egjipti”.
Studentja egjiptiane do të deklaronte më pas, “Ne jemi në krah të njerëzve të shtypur në Egjipt. Sepse ne duam drejtësi dhe liri.”
Më herët, gjatë konferencës së përbashkët për shtyp, kancelarja gjermane shprehu kundërshtinë ndaj dënimeve me vdekje në Egjipt.
“Ne kemi diskutuar çështjen e dënimeve me vdekje. Numri i lartë i dënimeve me vdekje … nga këndvështrimi ynë, kjo është diçka që duhet penguar. Gjermania është kundër dënimit me vdekje,” qenë fjalët e saj.
Por duket se vërejtjet e Merkelit nuk patën ndikim në qëndrimin e Sisit, i cili shfaqi palëkundshmërinë në politikën e tij. “Mbi dënimet me vdekje … ju keni këndvështrimin tuaj, që ne po e respektojmë. Dhe ju po ashtu duhet të tregoni respekt për këndvështrimin tonë.”
“Le të presim fundin e procedurave ligjore, e të shohim se çfarë vjen më pas,” vijoi më tej Sisi.
Vizita e Sisit në Gjermani ka qenë ndër më të diskutuarat, ndërsa vetë kancelarja gjermane kishte deklaruar kohë përpara se nuk do ta priste atë në Berlin gjersa Egjipti të mbante zgjedhje parlamentare të ndershme; zgjedhje që nuk janë bërë ende.
Një zë i fortë kundër vizitës së presidentit egjiptian, organizatorit të grushtit të shtetit, ka qenë ai i kryetarit të parlamentit gjerman, Norbert Lammert, i cili deklaroi se nuk kishte arsye për një takim me Sisin, sepse ai nuk i kontribuon as paqes, e as demokratizimit të vendit të tij.
Mospajtimet mes zyrtarëve gjermanë dhe egjiptianë në aspektet politike nuk i kanë penguar të bien dakort për marrëveshje në fushën ekonomike. Kështu, gjigandi Siemens nënshkroi një marrëveshje me Egjiptin prej 8 miliardë eurosh në fushën e energjisë. /tesheshi.com/
