Ministrat e Jashtëm të Ligës Arabe vendosën të dielën të rikthejnë Sirinë në organizatë pas më shumë se një dekade pezullimi, njoftoi zëdhënësi i saj.
Vendimi u mor në një takim të mbyllur të ministrave në selinë e Lidhjes në Kajro, tha Gamal Roshdy, zëdhënës i sekretarit të përgjithshëm të organizatës, raportoi Reuters.
Anëtarësimi i Sirisë u pezullua në vitin 2011 pas një shtypjeje të përgjakshme të protestave në rrugë kundër sundimit të Bashar al-Assad që më vonë u përshkallëzua në luftë civile. Një pjesë e madhe e shteteve arabe tërhoqën ambasadorët e tyre nga Damasku.
Por kohët e fundit, disa shtete arabe, përfshirë Arabinë Saudite dhe Egjiptin, kanë rivendosur marrëdhëniet diplomatike me Sirinë. Disa shtete, si Katari, janë ende kundër normalizimit të plotë të marrëdhënieve me Damaskun pa zgjidhje politike të konfliktit atje.
Shtetet arabe po përpiqen të arrijnë një konsensus nëse do ta ftojnë Assadin në takimin e Ligës Arabe që do të mbahet në Riad më 19 maj. /tesheshi.com/
