Një Skënderbe, por i varfër ndodhet në fshatin Zhejë të Kurbinit. Djaloshi 15-vjeçar është pagëzuar me këtë emër nga babaj i tij Sinan Paja, 66 vjeç, i cili është krenar për këtë emër të heroit tonë kombëtar, që ja ka lënë të birit.
Sinan Paja jeton në gjendje shumë të mjeruar me fëmijët, nga një lidhje martesore shumë e vonë. Dhe ndonëse në kushte të rënduara, Sinani ka gjetur një shkas për t`u ndjerë krenar pikërisht nga emrat që u ka vënë fëmijëve dhe kryesisht të djalit të vetëm, duke e quajtur Skënderbe.
Sinani ka një histori jetësore të veçantë, pasiqë në kohën e sistemit njëpartiak, kishte guximin të vishej ndryshe, aq sa ngjante si i huaj. Vishej paksa në mënyrë ekstravagante dhe mbante flokë të gjata. Kjo i ka kushtuar disa herë telashe me organet e rendit të kohës, ndërkohë që punonte në kooperativë.
Nga lidhja bashkëshortore e vonë do t`i lindnin dhe tre fëmijë: e para ishte vajzë, të cilën e quajti Lulëkuqe; më pas vjen djali, Skënderbeu; i lind sërish vajzë të cilën e quan Mbretëreshë; dhe tashmë, 66-vjeçari kërkon të ketë të tjerë fëmijë, mundësisht djem, që t`i quajë Herkul ose Hitler.
Skënderbeun, djalin e vetëm, do ta shohësh gjithkund krah babait, po ashtu dhe vajza më e vogël, Mbretëresha.
Një vit më parë atyre iu dogj shtëpia nga një shkëndijë elektrike dhe për disa ditë pesë anëtarët e kësaj familje kaluan netët jashtë, madje në kushte atmosferike të rënduara nga rreshjet e shiut.
Janë të varfër, por përpiqen t`i japin kuptim jetës dhe me detaje të tilla të veçanta, siç janë emrat e tyre.
Përgatiti: Ahmet Zani – tesheshi.com
