Filmi “Dheepan” i regjisorit francez Jacques Audiard ka fituar Palmën e Artë në festivalin e 68-të të filmit në Kanë. Filmi me metrazh të gjatë i Audiard, është frymëzuar pjesërisht nga “Letrat persiane” të Montesquieu dhe tregon historinë e tre emigrantëve të arratisur nga Sri Lanka.
Drama- Dheepan është një ish luftëtar i grupit ushtarak nacionalist Tigri Tamil, i cili do të arratiset nga lufta civile në Sri Lanka. Për tu shtirur se ka një familje dhe për të kërkuar azil politik në Europë, ai merr me vete një grua dhe një vajzë.
Të tre arratisen në Paris, ku Dheepan gjen punë si roje në periferi të qytetit. Ai shpreson të ndërtojë një jetë të re në Francë por i duhet të ndeshet çdo ditë me dhunën e të tjerëve që i rrethojnë dhe njëkohësisht i duhet të mbrojë familjen e tij të re.
Çfarë mendon shtypi i huaj- E përditshmja franceze “Le Monde” ka nënvizuar se me këtë film Jacques Audiard ka dashur të bëjë kronikën e një fenomeni social, duke evokuar për fatin e shumë emigrantëve të larguar nga vendlindjet e tyre dhe që kanë harruar domethënien e fjalës mikpritje.
“The Guardian”, në një shkrim të Andrew Pulver, i ka dhënë filmit Dheepan katër yje nga pesë të mundshme. “Filmi pa asnjë dyshim është i fortë dhe tregon një pjesë të realitetit. Në pjesën e fundit jepet i gjithë mesazhi ndërsa i gjithë filmi ecën ngadalë, qetë dhe në të nuk ndodh thuajse asnjë gjë”,- shkruan Puver.
Siç mund ta kuptoni, nga përmbledhja në pak fjalë e subjektit të filmit, të cilin jua këshillojmë ta ndiqni, në të mund të gjejnë veten një pjesë e mirë e shqiptarëve, të cilët detyrohen të largohen nga Shqipëria dhe të kërkojnë azil politik në shtete të tjera, ku mendojnë se do të gjejnë parajsën, por që në të vërtetë përplasen në ferr. /tesheshi.com/
